Barcelona ndez shpresat për Paul Pogba

Barcelona ndez shpresat për Paul Pogba

Merkato në Angli është mbyllur, afrime nuk do të ketë më, pra vetëm dalje pritet të ketë. Kështu, Manchester United duhet që të kujdeset për Paul Pogba, i cili dëshirohet nga Barcelona në Spanjë. Megjithatë, pranë blaugranave ende nuk sqarojnë se si po shkon operacioni.

Ky operacion është i komplikuar, pasi ka ende të dhëna që duhen plotësuar që Pogba të transferohet. Kryesore për momentin është dëshira e lojtarit, i cili do largimin nga United për shkak se nuk përputhet me karakterin e Jose Mourinho-s. Por, për faktin se klubi anglez nuk ka firmosur me asnjë mesfushor tjetër, atëherë do të jetë e vështirë që Pogba të largohet.

Dëshirën e francezit për t’u larguar nga “Djajtë e Kuq” e konfirmon dhe agjenti i tij, megjithatë, kontrata e lojtarit është e vlefshme deri në qershorin e vitit 2021. Për këtë temë ka folur edhe legjenda Rio Ferdinand, i cili publikisht ka kërkuar që dikush në klub t’i vendosë kapak thashethemeve rreth lojtarit francez.

Nga ana tjetër, në Spanjë pranojnë se Pogba është pranë nënshkrimit me Barcelona-n sipas kontakteve të mediave me agjentin Mino Raiola. Për këtë arsye pritet që të ketë dhe një takim mes drejtuesve të Barça-s, të cilët do të përcaktojnë se çfarë do të bëjnë për mesfushorin. Është e qartë se afrimi i Pogba-së do të rriste cilësinë e mesfushës së Barcelona-s, por edhe imazhin ndërkombëtar të klubit, arsye që do të shtyjnë drejtuesit të veprojnë për këtë rast.

Pavarësisht dëshirës së katalanasve për të afruar fituesin e Botërorit, ka një fakt që nuk e favorizon këtë transferim. Bëhet fjalë për klauzolat e lirimit të lojtarëve, të cilat nuk ekzistojnë në Angli. Por, ekziston një pikë në kontratat e Premier League, ku lojtarët nëse nuk ndihen mirë apo që iu janë shkelur të drejtat e punës, atëherë ata mund të ndryshojnë klubin e tyre. /EDS/

***********************

Ndalohet ripostimi apo kopjimi i këtij artikulli pa lejen me shkrim nga eduasportin.com.

Eduasportin.com është vendtakimi i duhur për lajmet dhe të rejat nga bota e sportit. Ndiqni rrjetet sociale për argëtim, lojëra e quiz-e pafund. Lajme Sportive nga vendi e bota në kohë reale nga Futbolli dhe sportet e tjera.