Bicaj: Partizani e humbi titullin prej një dështaku

Ti mund ta lexosh kete ne 3 min.
12 Shkurt 2018 23:27
Ju zbuloj pengun tim më të madh...

Ditmar Bicaj dhe Flamurtari i tij po zhvillojnë një sezon të shkëlqyer duke befasuar javë pas jave me rezultatet e regjistruara në fushë. Kampionati nuk ishte një objektiv për kuqezinjtë edhe pse tani e shohin veten si skuadra anti-Skënderbe, por Kupa e Shqipërisë po. Qendërmbrojtësi në një intervistë për “Eduasportin.com” zbulon ambiciet e tij si dhe pengun e madh të karrierës. Gjithashtu lezhiani foli edhe për largimin e tij të zhurshëm nga Partizani dhe marrëdhëniet me Duron dhe Starovën.

Nga Partizani ju larguan si të parëndësishëm, por tani ata vuajnë dhe të mërkurën në rast kualifikimi do t'i jepnit një shuplakë të fortë. Çfarë ndjesie është për ju?

“Nga Partizani u largova me pak zhurmë, por nga polemikat me ish-trajnerin e atëhershëm. Erdhi me shumë bujë dhe iku si i dështuar. Kam patur bisedime të gjata me drejtuesit dhe dëshira ishte e imja të shkëputesha, sepse kisha një ofertë të mirë nga Irani dhe drejtuesit më lejuan. Edhe sot ruaj marrëdhënie shumë të mira me stafin e Partizanit, por ua kam thënë edhe në sy, që gabimi me i madh i atij sezoni ishte largimi i Starovës në janar dhe ekipi humbi shumë pikë rrugës me trajnerin italian (Andrea Agostinelli-n). Dua të veçoj, që kampionatin e humbëm në Tiranë me Bylysin ku u mundëm 1-2”.

Çfarë ju tha administratori Sinan Idrizi pas humbjes në Korçë?

Me presidentin nuk kemi patur takim pas ndeshjes, por besoj që është i kënaqur me ecurinë pozitive të këtij sezoni nga ekipi.

Biseduat më pas me Muzakën për golin dhe mënyrën sesi ai festoi?

Muzakën e kam mik të vjetër, por nuk e takova pas ndeshjes. Përpara ndeshjes jemi takuar dhe e kam ngacmuar ne lidhje me videon gazmore të Bogdanit tek fliste me Salihin, që ai kishte publikuar. Edhe kur kemi qenë bashkë tek Skënderbeu kemi një histori të tillë me një video gazmore.

Keni marrë komente për sezonin e Flamurtarit?

Të gjithë na kanë vlerësuar. Jam i kënaqur me formën që po kaloj tek ekipi i Flamurtarit dhe ndjehem shumë mirë, që jetoj në një qytet jashtëzakonisht të bukur siç është Vlora. Po bëjmë një sezon të mirë dhe shpresoj të vazhdojmë kështu.

Po nga Partizani, keni patur ndonjë kontakt me ish-shokët pas fitores?

Tek Partizani kam shumë shokë si; Hoxha, Batha, Trashi, Kalari. Me këtë të fundit flas çdo ditë dhe e ngacmoj shpesh (qesh).

A ju vjen mirë kur e shikoni Partizanin në këto pozita, duke menduar mënyrën si ju larguan?

Partizani është ekip i madh, por këtë sezon ka patur shumë probleme, sepse ka patur ndërrim trajnerësh dhe shumë lëvizje lojtarësh. Një ekip si Partizani duhet menaxhuar me shumë kujdes, por këtë sezon besoj, se menaxhimi ka lënë shumë për të dëshiruar.

Duro apo Starova?

Të dy janë njohje të vjetra për mua. Duro dhe Starova janë dy steka të vjetra të trainingut shqiptar për të cilët kam shumë konsideratë. Do të zgjidhja profesor Duron, sepse është njohje e vjetër e imja. Që në moshën 17 vjeçare më ka grumbulluar me ekipin kombetar U-17 dhe pastaj bashkëpunimi tek  Skënderbeu, me të cilin u shpallëm kampionë dhe së fundmi tek Flamurtari. Është një njeri të cilin e vlerësoj shumë dhe kuptohemi shumë mirë në çdo gjë.

Pengu më i madh në karrierë, nëse keni?

Kupa e Shqipërisë. Uroj shumë dhe dua me gjithë shpirt që ta fitoj kupën me Flamurtarin këtë sezon. Është një trofe që më mungon shumë, një finale e kam humbur me Skënderbeun kundër Tiranës në vitin 2012.

Intervistoi: Drilon Xhepollari /EDS/

Kërkesa për kod të ri
Ne ju kemi dërguar një link për të ndërruar kodin. Ju lutem kontrolloni postën tuaj elektronike