Formula 1 | Bie Ferrari, Ricciardo është mbreti në Kinë

Ti mund ta lexosh kete ne 2 min.
15 Prill 2018 10:38

Vettel e Raikkonen e nisën të parët në “Çmimin e madh të Kinës”, por ai që triumfoi në fund ishte Daniel Ricciardo me Red Bull-in e tij. Finlandezi i “kokëkuqes” ishte në një ditë “jo” dhe u parakalua shpejt nga rivalët. Në “pit-stop”-in  e parë Vettel humbi shumë, teksa ishte Bottas ai që mori kryesimin e garës, ndërsa më pas skuderia austriake e Red Bull shfrytëzoi një aksident mes makinave të Toro Rosso.

Një pit-stop i shpejtë për të dyja makinat, por tentativa e Verstappen, që po bënte një garë shumë të mirë, për të parakaluar Hamilton nuk shkoi sikurse duhet, pasi britaniku e dërgoi jashtë piste pilotin e Red Bull. Ricciardo ishte aty dhe e parakaloi Hamilton, për të vijuar me garën super të tij. Gomat e montuara në “pit-stop” i erdhën në ndihmë dhe arriti të dalë përpara Vettel e Bottas. Gjermani i Ferrari-t zbriti në vendin e tretë, por ka edhe më keq.

Verstappen vijon me përplasjet e tij dhe e goditi Vettel, që shkoi në vendin e shtatë, ndërkohë që për pilotin e Red Bull pati një penalizim me 10 sekonda. Në fund të garës ishte Ricciardo ai që triumfoi, ndërkohë që pas tij e mbyllën Bottas me Raikkonen. Hamilton u rendit i katërti, ndërsa Vettel u la pas edhe nga Fernando Alonso, që u pozicionua në vendin e shtatë me McLaren-in e tij. Gjithsesi gjermani ruan kryesimin pas tre garave të para.

Vettel ka grumbulluar 54 pikë, kurse pas tij renditet Hamilton me 45 pikë. Valtteri Bottas ëshët i treti dhe ka 40 pikë, për t’u pasuar nga Ricciardo me tre pikë më pak. Raikkonen ka vetëm 30 pikë deri më tani. Ndërkohë për konstruktorë Mercedes ka marrë vendin e parë me 85 pikë, një më shumë se Ferrari. Red Bull është i treti me 55 pikë. Deri në fund duket se gara do të jetë shumë e fortë si për kampionin e ri të Botës, ashtu edhe për titullin për konstruktorë. /EDS/

Kërkesa për kod të ri
Ne ju kemi dërguar një link për të ndërruar kodin. Ju lutem kontrolloni postën tuaj elektronike