Historiku i Botërorëve/ Krijimi dhe të fshehtat e kompeticionit të parë Uruguay 1930

Ti mund ta lexosh kete ne 8 min.
30 Mars 2018 22:33
Si u organizua turneu unik

1930 – Uruguay- Lindja e Botërorit

Fakte

Periudha: 13 korrik -30 korrik

Finalja: Argjentina - Uruguaj 2-4

Vendi i tretë: Shtetet e Bashkuara                                                                             

Vendi i katërt: Jugosllavia

Ekipe: 13

Stadiume: 3

Qytete: 1

Ndeshje: 18

Gola: 70

Pjesëmarrja: 434,500

Golashënuesi: Guillermo Stábile (Argjentina) (8 gola)

Historiku

Në fillim të shekullit të 20-të, në Olimpiadat Verore organizohej gjithmonë një turne futbolli. Bëhet fjalë për Olimpiadën e vitit 1900 e cila përfshiu për herë të parë në histori sportin e futbollit.

Ishte FIFA, e themeluar në vitin 1904, që filloi të menaxhojë turnetë e futbollit në Lojërat Olimpike në edicionet 1920, 1924 dhe 1928. Meqënëse FIFA dhe IOC (Komiteti Ndërkombëtar Olimpik) nuk gjetën gjuhën e përbashkët rreth statusit të lojtarëve amator, FIFA vendosi të organizonte një turne botëror futbolli jashtë Olimpiadës, duke krijuar në këtë mënyrë Kupën e Parë të Botës.

Më 26 maj 1928, në kryeqytetin e Holandës, Amsterdam, presidenti i FIFA Jules Rimet bëri të ditur planin për të organizuar një turne futbolli të pavarur nga Lojërat Olimpike në vitin 1930. Më 18 maj 1929, FIFA njoftoi në kongresin e Barcelonës se Kupa e parë e Botës do të zhvillohej në Uruguaj. Në shenjë hakmarrje IOC vendosi të përjashtonte futbollin si sport në Olimpiadën e vitit 1932.

Janë disa arsye pse Uruguai u përzgjodh si vend organizator. Uruguai në atë kohë ishte kampion i Olimpiadave 1924 dhe 1928 dhe vendi festonte 100-vjetorin e saj. Kur Federata e Uruguajit u ofrua të paguante të gjitha shpenzimet, si shpenzimet e udhëtimit dhe akomodimit të ekipeve pjesëmarrëse, u bë e qartë se Uruguai do të zgjidhej si vendi i parë që do të organizonte një Kupë të Botës. Vendet e tjera si Hungaria, Holanda, Suedia, Italia dhe Spanja të cilët kishin shpallur kandidaturën përt të organizuar Botërorin, u tërhoqën në favor të Uruguajit.

Ekipet Pjesëmarrëse

Vetëm 13 shtete morën pjesë në Kupën e parë të Botës 1930. Ishin 7 vende nga Amerika e Jugut: Uruguai, Brazili, Argjentina, Paraguai, Kili, Peru dhe Bolivi. Ky është numri më i madh i vendeve nga Amerika e Jugut që kanë marrë pjesë në një Kupë të Botës. Është gjithashtu i vetmi edicion ku marrin pjesë më shumë vende nga Amerika e Jugut se sa nga Evropa. 4 shtete nga Evropa morën pjesë: Franca, Belgjika, Jugosllavia (Mbretëria e Jugosllavisë) dhe Rumania. 2 shtete nga Amerika Veriore / Qendrore dhe Karaibe: SHBA dhe Meksika.

Çdo vend i anëtarësuar ne FIFA u ftua të marrë pjesë, ku një ndër to ishte edhe Shqipëria. Shumë vende evropiane, refuzuan me arsyetimin që Uruguai ishte shumë larg. Po flasim për vitin 1930; dhe kjo do të thotë se fluturimi nuk ishte ende diçka që mund të përballohej nga të gjithë. E vetmja mënyrë ishtë të udhëtoje me anije. Pasi kishin mbetur vetëm 2 muaj nga fillimi i këtij kompeticioni, asnjë shtet evropian nuk ishte rregjistruar. Jules Rimet ndërhyri duke përdorur edhe lidhjet politike. 4 vende evropiane vendosën në minutën e fundit që të merrnin pjesë në Kupën e Botës 1930.

Rumania, Belgjika dhe Franca udhëtonin me të njëjtën anije, SS Conte Verde. Me ekipet udhëtonin gjithashtu edhe tre gjyqtarët evropianë dhe Jules Rimet që transportonte trofeun e Kupës së Botës. Jugosllavia ishte i vetmi ekip qe vendosi të udhëtonte me një anije mallrash të quajtur Florida.

Grupet

Meqënëse 13 është numër tek, ekipet u ndanë në 4 grupe, ku një grup përbehej nga 3 skuadra. Shorti u hodh në Montevideo, pasi kishin ardhur të gjithë ekipet. 4 shtete ishin koka grupi, pasi konsederoheshin si ekipet më të forta. Ato ishin Uruguai, Argjentina, Brazili dhe SHBA dhe u zgjodhën nga Komiteti Organizativ i FIFA-s. Kjo ishte hera e parë që u zgjodh një format i tillë. Fitorja kishte vlerën e 2 pikëve kurse barazimi 1 pikë.

Fituesi nga secili grup do të vazhdonte në gjysmëfinale, duke filluar në këtë mënyrë faza e eliminimit. Në këtë fazë, u vendos të luhej 30 minuta kohë shtesë nëse nuk do të kishte fitues pas kohës së rregullt, por nuk ishte e nevojshme. Pas gjysëmfinales u luajt vetëm finalja, pasi nuk ishte vendosur të luhej ndeshje për vendin e tretë.

Grupet ishin këto:

Grupi 1

Grupi 2

Grupi 3

Grupi 4

Argjentina

Jugosllavia

Uruguaj

Shtetet e Bashkuara

Kili

Brazili

Rumania

Belgjika

Franca

Bolivia

Peruja

Paraguaj

Meksika

 

 

 

Stadiumet

Vetëm 3 stadiume janë përdorur për ndeshjet e Kupës së Botës 1930, numri më i ulët në historinë këtij kompeticioni. Të gjitha ndeshjet u zhvilluan në 1 qytet të vetëm: kryeqytetin e Uruguajit Montevideo. Estadio Centenario u ndërtua posaçërisht për Kupën e Botës 1930 dhe në kuadër të 100 vjetorit të Uruguajit. Fillimisht u planifikua që të gjitha ndeshjet e Kupës së Botës të zhvilloheshin në këtë stadium, por për shkak se stadiumi përfundoi së ndërtuari vetëm 5 ditë pas fillimit të Kupës së Botës, u përdorën edhe Estadio Parque Central dhe Estadio Pocitos. Gjysëm finalet dhe finalja u luajtën në Estadio Centenario.

NDESHJET E PAHARRUESHME

GRUPI 1

Francë - Meksikë 4-1

Estadio Pocitos, Montevideo, 3.000

Ndeshja e parë në një Botëror, së bashku me ndeshjen SHBA kundër Belgjikës. Në këtë ndeshje megjithatë u shënua goli i parë i Kupës së Botës. Ishte lojtari francez Lucien Laurent i cili shënoi këtë gol të paharrueshëm në minutën e 19-të. Marcel Langiller dhe André Maschinot (2x) shënuan 3 gola në total për Francën. André Maschinot ishte lojtari i parë që ka shënuar 2 gola në një ndeshje të Botërori. Juan Carreo u bë i pari që shënoi për Meksikën.

Argjentinë - Meksikë 6-3

Estadio Centenario, Montevideo, 50.000

Kjo është ndeshja e parë e Kupës së Botës ku janë shënuar më shumë se 5 gola në total. Kjo ndeshje u bë e famshme për shkak të hat-trick-ut nga Guillermo Stábile (me pseudonimin El Enfiltrador). Kjo ndeshje është gjithashtu e njohur për penalltinë e parë të shënuar në historinë e Kupës së Botës,realizuar nga meksikani Manuel Rosas.

Grupi 2

Jugosllavi - Brazil 2-1

Estadio Parque Central, Montevideo, 5.000

Brazili ndeshjen e parë në një Botëror e humb me rezultatin 2-1. Ishte edhe ndeshja e parë në një Botëror që luante një vend i Amerikës Latine. Pritej që Brazili të kryesonte grupin, por për habi u fitua nga Jugosllavia. Aleksandar Tirnanic dhe Ivan Bek shënuan 2 gola për Jugosllavinë. Sulmuesi brazilian Preguinho shënoi golin e vetëm dhe të parë në një Botëror për Brazilin.

Grupi 3

Rumani - Peru 3-1

Estadio Pocitos, Montevideo, 300

Vetëm 300 njerëz e ndoqën këtë ndeshje. Kjo është pjesëmarrja më e ulët në ndonjë Botëror. Mund të thuhet me siguri se ky rekord nuk mund të thyhet përsëri. Mesfushori peruan Plácido Galindo u bë lojtari i parë që do të ndëshkohej me karton të kuq në një Botëror. Pati edhe një konflikt midis lojtarëve, ku u desh ndërhyrja e policisë. Rumania fitoi me gola të shënuar nga Adalbert Deu, Constantin Stanciu dhe Nicolae Kovács. Peruani Luis de Souza Ferreira shënoi golin e parë për Perunë në një Botëror.

Finalja

Finalja e parë e Botërorit u zhvillua midis dy vendeve nga Amerika Latine: Argjentinës dhe Uruguait. Të dy ekipet kishin fituar çdo ndeshje para se të arrinin në finale.Kjo finale u fitua nga Uruguai. Trajneri i Uruguajit Alberto Suppici ishte shumë i rreptë dhe nuk priste asgjë tjetër veçse disiplinë nga lojtarët e tij. Portieri Andrés Mazali u bë i pari lojtar që do të dëbohej nga një ekip pjesmarrës në Botëror. Ai u largua nga hoteli gjatë natës, ndërkohë që ishte e ndaluar nga trajneri. Ai nuk u rikthye më në ekipin kombëtar. Finalja e zhvilluar më 30 korrik u ndoq nga 93,000 njerëz në stadiumin Estadio Centenario. Gjyqtari belg, John Langenus, i cili drejtoi finalen, kërkoi një sigurim për jetën dhe një anije që të largohej direkt pas finales. Tensioni ishte i lartë gjatë finales. Lojtari argjentinas Luis Monti u kërcënua me vdekje.

Finalja u luajt me 2 topa të ndryshëm. Topi 1 u zgjodh nga Argjentina dhe u përdor në pjesën e parë. Topi 2 u zgjodh nga Uruguai dhe u përdor në pjesën e dytë. Kjo u vendos për shkak të mosmarrëveshjeve midis dy vendeve. Ishte gjyqtari John Langenus i cili e dha këtë ide. Uruguai e filloi mirë duke shënuar golin e parë në minutën e 12-të nga Pablo Dorado. Argjentina megjithatë, shënoi 2 gola pas kësaj në pjesën e parë. Goli i parë u shënua nga Carlos Peucelle (20 ') dhe goli i dytë i Guillermo Stábile (37'), të cilin disa thonë se ishte në pozicion jashtë loje.

Në pjesën e dytë u pa një Uruguaj nervoz. Megjithatë pak më shumë se 10 minuta pas fillimit të pjesës së dytë, Pedro Cea barazoi rezultatin 2-2 (57 '). Uruguai nuk ishte ende e kënaqur dhe shënoi 2 gola të tjerë me Santos Iriarte (68 ') dhe Hector Castro (89') i cili luante me një krahë, pasi krahun e majtë e kishte humbur në një aksident. Me këto 2 gola Uruguai siguroi trofeun e Kupës së Botës me një rezultat mbresëlënës: 2-4.

 

Kuriozitete

  • Për shkak të dëmtimit, portieri francez Alex Thépot u bë i pari lojtar në historinë e Kupës së Botës që zëvëndësohet nga një lojtar tjetër (Augustin Chantrel) gjatë një ndeshje (kundër Argjentinës)
  • Argjentina dhe Kili kishin trajnerët më të rinj në historinë e Kupës së Botës: 27 vjeç Juan Jose Tramutola dhe 29 vjeçar Gyorgi Orth
  • E vetmja Kupë e Botës që nuk u zhvilluan ndeshje kualifikuese, edhe secili anëtari i FIFA-s u ftua të merrte pjesë
  • E vetmja Kupë e Botës së bashku me atë të vitit 1950, që nuk zhvilloi ndeshje për vendin e tretë
  • Peruja do të kualifikohej sërisht në një Botëror vetëm në vitin 1970
  • Ekipi rumun u përzgjodh personalisht nga Mbreti Carol II i cili u premtoi lojtarëve para dhe garanci për punë pas turneut
  • Lojtari i fundit i mbijetuar i Botërorit 1930 ishte Francisco Varallo nga Argjentina, që vdiq më 20 Gusht 2010 në moshën 100 vjeçare, 80 vjet pas Kupës së Botës në Uruguaj
  • Lojtari francez Lucient Laurent ishte i vetmi që pa Francën duke fituar Kupën e Botës në Francë '98

 

 

Heynckes i habitur: Nuk kam parë një ndeshje të tillë!!!

Ti mund ta lexosh kete ne 2 min.
25 Prill 2018 23:31

Gjashtë fitore radhazi për Real Madridin kundër Bayern Munchen, ndërsa Jupp Heynckes humbet për herë të parë në pesë vjet në Campions League. Një humbje që komplikon shumë shanset e kampionëve të Gjermanisë për të shkuar në finalen e Campions. Tani “Los Blancos” janë shumë afër suksesit të trefishtë në këtë veprimtari, ndonëse e dinë se janë edhe 90’ minuta për t’u luajtur. Në përfundim të takimit, bavarezët u shfaqën të zhgënjyer, ndërsa besojnsë se mund ta përmbysin disavantazhin në ndeshjen e kthimit në “Santiago Bernabeu”.

“Ia dhuruam të dy golat Real Madridit. Nuk ishim efikas përpara portës, krijuam vërtetë shumë raste, por nuk arritëm t’i shfrytëzonim. Kjo na penalizoi. Pika e kthesës për ta ishte goli i barazimit, nuk kam parë ndonjëherë një gjysmëfinale të Champions të kishte kaq shumë raste të pashfrytëzuara, aq më shumë ndaj Real Madridit. Gjithashtu dëmtimet bën të vetën”, tha Jupp Heynckes.

Thomas Müller, kapiteni i Bayern thotë se kualifikimi është i hapur, ndërsa e pranoi se u treguan të dobët. "Ne ishim shumë naiv... Ne patëm shumë shanse dhe shkuam në 1-1, në pjesën e dytë ata kalun shumë shpejt në avantazh. Sonte rezultati mund të ishte shumë më ndryshe”. “Ne e pamë vitin e kaluar se gjithçka është e mundur në Madrid, ku ishim në gjendje të ktheheshim nga një defiçit 1-2. Ne patëm disa shanse shumë të mira, por ndoshta rëndësia e ndeshjes luajti një rol... gjithsesi duhet të kishim marrë një rezultat më të mirë sonte", shtoi gjermani.

"Ishte e dhimbshme që Robben u largua aq herët: ai është një lojtar që i tërheq kundërshtarët rreth vetes dhe kjo krijon hapësirë për mua, kjo nuk nënkupton se Thomas nuk ka bërë një punë të mirë - ai krijon boshllëqe me lëvizjen e tij", tha autori i golit të vetëm të Bayern, Kimmich. /EDS/

Lajm jo i mirë për tifozët, Rusia me sanksione të forta për Botërorin 2018

Ti mund ta lexosh kete ne 1 min.
25 Prill 2018 23:06

Në një përpjekje për të parandaluar dhunën e tifozëve gjatë Botërorit, zyrtarët rusë kanë marrë vendimin për të ndaluar pijet alkoolike në Moskë gjatë zhvillimit të këtij kompeticioni. Në fakt alkooli do të lejohet të shitet nëpër stadiume apo zonat e tifozëve, por Bashkia e Moskës do të kufizojë shitjen e pijeve alkoolike jashtë këtyre zonave në kryeqytet, në ditën e ndeshjeve dhe një ditë përpara.


Kohët e fundit tifozët rusë kanë krijuar rrëmuja kudo ku kanë udhëtuar, kur gjatë zhvillimit të Euro 2016 në Francë u konfliktuan me përkrahësit anglezë, që u pasua nga në një numër i madh arrestimesh. Në formë hakmarrjeje huliganët nga vendi pritës kanë kërcënuar me vdekje tifozët anglezët, nëse vendosin të udhëtojnë në Rusi.


Zyrtari i Bashkisë së Moskës, Kirill Malyshkin deklaroi: "Organet ekzekutive kanë përcaktuar tashmë vendet ku do të ndalohet shitja dhe konsumimi i alkoolit, në prag të një ndeshje futbolli të Kupës së Botës. Pubet, restorantet, supermarkete dhe të gjitha pikat e tjera të shitjeve, do të preken nga ky vendim dhe janë të detyruara të zbatojnë këtë vendim, sepse në të kundërtën do të kenë pasoja të rënda”.

Në dy stadiumet e Moskës do të zhvillohen gjithsej 12 ndeshje gjatë gjithë turneun, duke përfshirë finalen dhe gjysmëfinalen. Por për habinë e të gjithëve, tifozët do lejohen të hyjnë në stadium me kanabis, kokainë dhe madje heroine, por jo me alkool. /EDS/

Ky do ishte formacioni super i Basel nëse nuk do i shiste yjet

Ti mund ta lexosh kete ne 2 min.
25 Prill 2018 23:01

Të gjithë janë habitur me formën e fantastike të Mohamed Salah gjatë këtij sezoni. Por janë të paktë ata që e dinë faktin që egjiptiani karrierën në Evropë e ka nisur në Zvicër te Basel. Pas një performance fantastike në Zvicër, ai mahniti drejtuesit e Chelsea-t që nuk humbën kohë dhe e transferuan në Londër. Por aventura në Angli nuk ishte ajo që priste lojtari, për shkak se Mourinho nuk besonte tek ai. Në merkaton e janarit, egjiptiani u përfshi në shkëmbimin, që pa Cuadradon të transferohej në Londër, dhe Salah në Fierenze. Vetëm pas një viti u transferua te Roma, ekip që e shiti tek Liverpool për shifrën 40 milion euro, ku po shkruan emrin në historinë e këtij klubi. Por Salah nuk është i vetmi lojtar i madh, që është formuar tek Basel. Ekipi zvicerian do të kishte një ekip pretendent për të fituar Champions League, po të mos t’i shiste këta lojtarë gjatë kësaj dekade të fundit.


Porta do të mbrohej nga Yann Sommer, që aktualisht luan tek Borussia Moenchengladbach.


Mbrojtja do të përbëhej nga Marcelo Diaz (Pumas), Fabian Schar (Deportivo de la Coruna), dhe David Abraham, aktualisht tek Eintracht Frankfurt.


Boshti i skuadrës do të ishte mesfusha, ku do të përbëhej nga lojtarë kalibri si Ivan Rakitic (Barcelona), dhe dy lojtarët që aktivizohen tek Arsenali, Granit Xhaka dhe Mohamed Elneny, dhe do të kompletohej nga Gokhan Inler, i cili luan në Basaksehir i transferuar nga Napoli.


Sulmi, përveç Salahut do të përbëhej nga Xherdan Shaqiri, ish-futbollist i Bayern Munich dhe Interit që për momentin aktivizohet me Stoke City-n si dhe Felipe Caicedo, i cili është tek Lazio, me një të kaluar tek ekipe si Manchester City, Sporting, Malaga, Levant, Lokomotiv Moska dhe Espanyol.


Këto janë sakrificat që duhet të bëjë një ekip i vogël si Basel, që me të ardhura modeste ka zbuluar lojtarë të shkëlqyer. /EDS/

VIDEO | Tersi s'i ndahet Bayern, Marcelo e Asensio i falin përmbysjen Realit

Ti mund ta lexosh kete ne 3 min.
25 Prill 2018 22:38
Bavarezët luajnë mirë, por humbasin

Real Madridi shokon Bayern Munchen në “Allianz Arena” duke fituar me përmbysje falë golave të Marcelo dhe Asensio, që zhvlerësuan golin e Kimmich. Kampionët e Gjermanisë ishin ata që luajtën më mirë gjatë gjithë ndeshjes, por në fund kanë rëndësi golat që i shënuan miqtë nga Madridi, dhe tani janë me një këmbë në finale. Duhet theksuar fakti se Bayern humbi dy lojtarë tepër të rëndësishëm për shkak dëmtimi, në fillim Robben (5’) dhe Boateng (34’).

Robben shqetëson kampionët e Gjermanisë, pasi dëmtohet që në minutën e 5’ dhe largohet nga fusha për t’ia lënë vendin mesfushorit Alcantara. Pavarësisht dëshirës, goditja e parë e rrezikshme vjen në minutën e 19’ nga mbrojtësi Rafinha, i cili provon nga distanca, por Navas pret pa problem. Në minutën e 23’ Reali jep sinjalin e parë me anë të mbrojtësit Carvajal, por gjuajtja e tij është ballore dhe kontrollohet mirë nga Ulreich. Bayern zhbllokon rezultatin në minutën e 28’ në “Allianz Arena”, pas një kundërsulmi të shpejtë. Kimmich shënon një gol të mrekullueshëm, duke befasuar portierin e “Los Blancos”, nga një pozicion i vështirë. Pasi u mbushën 30’ minuta lojë Heynckes merr edhe goditjen e dytë, pasi mbrojtësi Boateng pëson një tërheqje dhe i duhet të largohet nga fusha i dëmtuar. Në vend të tij aktivizohet Sule. Ribéry ka shansin më të mirë për të mbyllur ndeshjen, por i vetëm përballë portierit nuk arrin të gjuajë, duke humbur një mundësi të artë për të dyfishuar shifrat (33’). Bayern luan më mirë, por është Reali që shënon. Një minutë nga fundi i kohës së rregullt Marcelo shënoi një gol mjaft të bukur në rastin e parë të rrezikshëm duke i dhënë një goditje të fortë Bayern.

Edhe në këtë pjesë sinjalin e parë e jep Bayern. Muller ka një mundësi mjaft të mirë për të kaluar Bayern në avantazh pas krosit nga e djathta nga Ribery, por Ramos është më i shpejtë dhe largon menjëherë rrezikun (51’).  Në minutën e 57’ Rafinha bëri një gabim të pafalshëm duke humbur një top në qendër të mesfushës, të cilin e rikuperon Asensio dhe pason menjëherë për Lucas. Ky i fundit ia kthen sërish dhe i vetëm me portierin, sulmuesi i ri spanjoll nuk e ka të vështirë ta dërgojë në rrjetë duke shokuar gjermanët. Një minutë më vonë Bayern i afrohet golit me Ribery, i cili gjuan fuqishëm nga brenda zonës, por Navas largon rrezikun në këndore. Ribery provon sërish, por francezi është i pafat në minutën e 69’, pasi topi përfundon ngjitur me shtyllën e majtë të Navas. 2’ minuta më vonë Ronaldo shënon pas një kundërsulmi të shpejtë, por gjyqtari e anuloi golin për prekje të topit me dorë nga portugezi. Në të 76’ Ulreich mban në lojë vendasit duke pritur një gol të sigurt, pas predhës nga Benzema. Në minutat e fundit nuk mungojnë rastet e rrezikshme, me Lewandowski-n që humbet një rast flagrant (88’), por portierët janë vendimtarë dhe ndeshja mbyllet me fitoren e Realit që prek finalen e Champions. /EDS/

Bayern Munich – Real Madrid 1-2

Shënues: Kimmich 28’/ Marcelo 44’, Asensio 57’

Bayern Munich: Ulreich, Hummels, Ribéry, Javi Martínez, Lewandowski, Robben, James Rodríguez, Rafinha, Boateng, Müller, Kimmich. Trajner: Jupp Heynckes

Real Madrid: Navas, Carvajal, Ramos, Varane, Ronaldo, Kroos, Modrić, Marcelo, Casemiro, Lucas Vázquez, Isco. Trajner: Zinedine Zidane

Gjyqtarë: B.Kuipers, S. Van Roekel, E. Zeinstra (Holandë)