Ja ku ngecën bisedimet ndërmjet Vllaznisë dhe Partizanit për Çinarin

Ti mund ta lexosh kete ne 1 min.
12 Janar 2018 16:40
Prapaskenat e negociatave ndërmjet dy klubeve

Vllaznia ka fituar “ndeshjen” e parë me Partizanin. Mesfushori Erald Çinari nuk do të lëvizë nga kuqeblutë. 21-vjeçari ka pasur pas vetes ekipin kryeqytetas, por gjërat kanë ngecur në vendnumëro dhe duket se situatat nuk do të ndryshojnë.

Burime pranë klubit kuqeblu bëjnë me dije për Eduasportin.com se drejtuesit e kuq kanë pasur kontakte me drejtuesit e Vllaznisë në lidhje me mesfushorin Çinari. Të kuqtë kanë dashur lojtarin, por nuk kanë paguar për kartonin e tij. Shkodranët nuk e kanë pranuar këtë opsion dhe ja kanë bërë të qartë kryeqytetasve: Çinari nuk lëviz!

Partizani po zhvillon përgatitjet në Antalia të Turqisë, Çinari në Ulqin me Vllazninë. Arritja e një marrëveshjeje duket shumë e vështirë, pavarësisht dëshirës së të dyja palëve. Lojtari dëshiron të provojë një aventurë të re, ndërsa të kuqtë e mirëpresin, por gjithçka është bllokuar nga drejtuesit shkodran. Ku i dihet, nën zë flitet se ka ndikuar edhe Fushaj për bllokimin e tij... /EDS/

Nuk u përshëndet me tifozët, Trashi zbulon arsyen

Ti mund ta lexosh kete ne 2 min.
24 Prill 2018 18:09

Partizani humbi me rezultatin 0-1 dje kundër Skënderbeut në stadiumin “Selman Stërmasi”. Të kuqtë zhvilluan një ndeshje të mirë, por në fund nuk ia dolën dot dhe morën humbjen e dytë kundër rivalëve kryesor pas asaj kundër Kukësit. Në fund, akuza për gjyqtarin kryesor Andi Koçi, lot dhe zhgënjim, ama, ata kanë “Ultras Guerrilsat”.Tifozët e kuq kanë kënduar për 90-minuta dhe pas vërshëllimës përfundimtare nga Koçi vazhduan duke festuar. E çuditshme, dukej se kishin fituar ata dhe jo korçarët. Tifozeria e kuqe meritoi notën “10 pa yll”, pasi sharjet dhe mund të shmangeshin, por në fund treguan se janë dhe “fair play”, pasi pranuan lojtarët e tyre.

Këta të fundit ishin në mëdyshje nëse duhej të përshëndeteshin me tifozerinë e kuqe, apo jo? Ata shkuam me hezitim, por u pranuan nga tifozeria e tyre. Ky sezon ka qenë i vështirë dhe në marrëdhëniet e ekipit dhe tifozëve, pasi këta të fundit janë zhgënjyer shumë. Një nga personat që nuk përshëndeti tifozët ditën e djeshme ishte mesfushori Lorenc Trashi. Ai u fut direkt në dhomat e zhveshjes pas ndeshjes dhe nuk shkoi te tifozeria. Diçka e tillë nuk u ka pëlqyer aspak tifozëve të kuq, pasi e kanë marrë si mungesë respekti ndaj tyre. Trashi ka reaguar dhe vetë në lidhje me këtë situatë dhe ka treguar se ka qenë thjesht një keqkuptim, por pavarësisht kësaj ka kërkuar falje me anë të një shkrimi në Instagram.

“Nuk dua ta bëj as për show mediatik, as për t’u justifikuar, por më kanë ardhur shumë mesazhe për pjesën e duartrokitjes në fund për tifozët. Unë personalisht kam hyrë direkt te dhoma e zhveshjes dhe nuk e kam bërë me qëllim diçka të tillë që nuk kam ardhur t’iu përshëndes. Thjesht nuk mund ta pranoja një humbje të tillë dhe ika direkt te dhoma. I kërkoj ndjesë publikisht të gjithë tifozëve, por sinqerisht nuk e kam bërë me vetëdije. E bëj këtë se ndihem disi në faj. Ndjesë veçanërisht 'Ultras Guerrilsave'“, - shkruan Trashi në Instagram. /EDS

Ndryshon sërish kalendari, FSHF vendos për Superioren

Ti mund ta lexosh kete ne 2 min.
24 Prill 2018 15:47
Trajnerët marrin vesh ndryshimet e fundit

Kalendari i javës së 31-të të Superiores ka ndryshuar sërish. Federata Shqiptare e Futbollit ka menduar që të gjitha ndeshjet e ditës së diel të luhen prej orës 19:00, ndryshe nga sa ishte parashikuar. Fillimisht, ishte vendosur që dy sfida të luhen në orën 16:00, ndërsa tani Federata lajmëroi se Teuta- Kamza dhe Vllaznia-Laçi do t’i bashkëngjiten supersfidës Skënderbeu-Kukës që do të luhet në Korçë, prej orës 19:00.

Superiorja do të luajë ndeshje mjaft interesante, pasi fundi i tabelës është bërë shumë intrigues. Megjithatë, ndeshjet e kësaj jave mund të sjellin pak më tepër qartësi për të ardhmen. Teuta përballet me Kamzën, dy ekipe që rivalizojnë për mbijetesën, ndërsa Vllaznia pret Laçin, një përballje që të dyja skuadrave iu duhet tripikëshi. FSHF-ja, më saktë Sektori i Garave ka menduar që përballjet që luhen për objektiva të njëjtë, mbijetesë apo Europë, të luhen në të njëjtën ditë dhe në të njëjtin orar.

Kështu, Luftëtari dhe Flamurtari do të ndeshen të shtunën në orën 16:00 në Gjirokastër, po ashtu edhe Lushnja – Partizani. Përveç Lushnjes që ka rënë matematikisht nga Superiorja, Partizani, Flamurtari dhe Luftëtari janë të interesuar për Europën, kështu që për të mos krijuar polemika është caktuar që të luhen në një orar.

E njëjta gjë edhe për një ditë më pas, të dielën në orën 19:00 Teuta do të përballet me Kamzën në “Niko Dovana”, ndërsa një tjetër sfidë e fortë do të jetë ajo e “Loro Boriçi”-t në Shkodër mes Vllaznisë dhe Laçit. Nëse në Durrës luhet direkt për mbijetesën, në Shkodër do të diskutohet edhe Europa, pasi Laçi do me padiskutim të renditet minimalisht në vendin e katërt për të kapur një vend në Europa League.

Sa i përket sfidës për kreun, pasi matematika i lejon, Skënderbeu do të presë Kukësin të dielën në mbrëmje, jo të premten siç ishte planifikuar. Në rast se korçarët fitojnë, atëherë mund të festojnë matematikisht titullin kampion para tifozëve të tyre. Por, në rast se barazimi apo humbjeje, kjo gjë e shtyn për më vonë festën. /EDS

E shtunë, 28/04/2018

Luftëtari – Flamurtari ora 16:00

Lushnja – Partizani ora 16:00

E diel, 29/04/2018

Teuta- Kamza ora 19:00

Vllaznia – Laçi ora 19:00

Skënderbeu – Kukësi, ora 19:00

Një Ziko për Shqipërinë dhe Superioren... sulmues, por jo legjenda e Brazilit!

Ti mund ta lexosh kete ne 1 min.
24 Prill 2018 15:32
20-vjeçari mund të ndjekë gjurmët e tij

Të gjesh një sulmues race në ditët që flasim është mjaft e vështirë. Lojtarë që premtojnë një thes me gola janë shumë të rallë, ndërsa Superiorja i ka me pikatore. Guri është golashënuesi i këtij viti me 15 gola, ndërsa Pejiçi apo Salihi që shënonin mbi 25 janë një kujtim i bukur. Në kushte që po flasim, një sulmues i ri me origjinë shqiptare po gjen minuta dhe ka debutuar në kampionatin grek të futbollit. Fjala është për Renato Zikon, ky i fundit luan për ekipin e Platanias në Superligën greke dhe ka arritur të debutojë me këtë skuadër.

Mosha e tij është e re dhe ka të dhëna premtuese, pasi është vetëm 20 vjeç. Ai luan prej vitesh në Superligën greke dhe ka gjetur përkrahje te ekipi i Platanias, pavarësisht se nuk ka marrë shumë minuta. Këtë sezon ka luajtur në 2 ndeshje duke koleksionuar vetëm 27 minuta, 6 takime ka qëndruar në pankinë. Ekipi i Platanias ka rënë në ligën e dytë greke dhe po mundohet që të promovojë futbollistët e rinj. Ziko po mundohet të shfrytëzojë faktin se ekipi i tij ka rënë dhe të marrë sa më shumë minuta. Platanias mbyll renditjen e klasifikimit në vendin e 16-të me vetëm 10 pikë. Ekipi grek ka siguruar rënien pas disa vitesh, ndërsa duket se Ziko nuk e ka ndërmend të qëndrojë aty.

Lojtari 20-vjeçar po mundohet të gjejë një ekip të ri për veten dhe nuk përjashtohet mundësia që në verë të transferohet në Superioren shqiptare. Ai është parë së fundmi nën praninë e menaxherit Drini Çaushi dhe kjo e lidh drejtpërdrejtë me ndonjë lëvizje drejt Superiores. Në fakt, Ziko ka moshën dhe për kombëtaren e Shpresave dhe mund të shihet nga trajneri Bushi, por fillimisht i duhet të luajë rregullisht dhe të fitojë formën e duhur. /EDS

Veprimet anti-sportive në Partizani-Skënderbeu, reagon fort Shoqata e Arbitrave

Ti mund ta lexosh kete ne 2 min.
24 Prill 2018 13:28
Gjyqtarët dënojnë veprimin e politikanit

Shoqata e Arbitrave ka reaguar në lidhje me veprimin e deputetit Erion Braçe në sfidën ndërmjet Partizanit dhe Skënderbeut. Në përfundim të takimit, Braçe i ulur në tribunën VIP ka goditur me çakmak gjyqtarin Andi Koçi. Një veprim i tillë ka bërë menjëherë jehonën dhe u shpërnda me shpejtësi në media, ndërsa tani është radha e Shoqatës së Gjyqtarëve për të reaguar, pasi në fund u sulmua një nga anëtarët e këtij kolegjiumi.

Në sajtin zyrtar të Federatës Shqiptare të Futbollit u publikua deklarata e Shoqatës së Gjyqtarëve që dënonin veprimin e deputetit Erion Braçe. Ky i fundit nuk ishte aspak i kënaqur me veprimet e gjyqtarit kryesor Andi Koçi në fund të ndeshjes. Dy faullet e akorduarnga gjyqtari kryesor afër zonës së Partizanit  sollën dhe golin e Ditës dhe ndëshkuan Prognin dhe Ibrahimin me kartonë të verdhë. I gjithë stadiumi rreagoi dhe mes tyre nuk mund të mungonte deputeti Erion Braçe. Zyrtari i lartë i shtetit njihet si një tifoz i thekur i "demave të kuq". Ai nuk mungon në asnjë ndeshje në tribunën qendrore të "Selman Stërmasit" kur Partizani luan në shtëpi.  

“Shoqata e Arbitrave Shqiptarë reagon për veprimin antisportiv dhe aspak fair nga ana e Deputetit të Kuvendit të Shqipërisë, Braçe i cili në përfundim të ndeshjes Partizani-Skënderbeu e vlefshme për javën e 30-të të Kategorisë Superiore ka goditur nga tribuna me një objekt arbitrin kryesor të takimit, në momentin e hyrjes për në dhomat e zhveshjes.

Shoqata e Arbitrave dënon një veprim të tillë nga ana e përfaqësuesit të ligjit, në drejtim të arbitrave, dhe njëherësh bën apel për më shumë gjakftohtësi dhe vetëkontroll, jo vetëm në këtë periudhë të mbetur ndeshjesh, por edhe në vijimësi. Ngjarja e fundit ishte e shëmtuar, aq më shumë kur të tilla veprime vijnë nga tribuna VIP. Të tilla situata nuk I përkasin aspak futbollit, dhe për më tepër marrin një simbolikë antisportive kur ideohen dhe kryhen nga një përfaqësues i ligjit”, - përfundon deklarata. /EDS