Kë të qajmë, futbollin apo Vllazninë me Teutën?

Ti mund ta lexosh kete ne 2 min.
16 Prill 2018 16:10
Historia e përhershme

Ndodh shpesh që në vendin tonë që një ekip të trajtohet si i nënë, një si i njerkës. E bën Federata, e bëjnë arbitrat, e bëjmë edhe ne. Se Lushnja bie nga Superiorja askujt s’ia ndjen (sigurisht tifozëve të shumtë të këtij ekipi po, pasi ata e vuajnë situatën e klubit të tyre), e dinin të gjithë se atë fat do të kishte. Superiorja do gjunjë, financa dhe mbështetje. Kur nuk i ke, më mirë të mos ngjitesh në elitë. Gjithsesi Lushnja e provoi dhe historia u përsërit, duke u larguar pa zhurmë.

Por kush do ta shoqërojë Lushnjën? Një vit më parë të gjithë bërtisnin me të madhe: “Pa Tiranën nuk ka Superiore”. Kemi humbur vetëm derbin dhe emocionet e tij, por një vit është. Partizani mungoi për disa vite në elitë, Dinamo nuk dihet ku ka kokën, por futboll luhet. Ka realitete si Kukësi, që për vite me radhë lufton për trofe. Disa mendojnë: “U prish dynjaja, fituan edhe këta titullin”. Po fiton edhe City në Angli dhe ka shumë që e përgëzojnë, pse nuk duhet ta pranojmë edhe në këtë realitet. Në Shkodër kanë këtë tjetrën: “Çfarë nuk nin njeri, lun Laçi Milotit futboll”. Luan dhe madje e bën mirë: Vllaznia nuk ka fituar prej më shumë se 10 ndeshjesh me kurbinasit. Kush ua ka fajin? E dinë, por nuk i gjejnë zgjidhje.

Zërat vajtues kanë nisur që tani: “Vllaznia i duhet Superiores, një qytet si Shkodra nuk e meriton një situatë të tillë”. E vërtetë, por kush ua ka fajin. Ndoshta po të bien në të Parën do të zënë mend. Mos do ishte më mirë kështu? Askush nuk e di, por edhe kështu si po “zvarriten” nuk ka hije për një klub futbolli me tradita. Gjithsesi nëse nuk luajnë në elitë vitin tjetër, askush nuk ka pse qan, aq më tepër që tani. Nëse vendoset në fushë, mirë t’i bëhet.

Pse duhet ta qajmë më shumë se Kamzën, apo se Teutën. Edhe për këta të fundit thuhet se i duhen Superiores, nuk duhet të bien dhe gjëra të tilla, njëjtë si me Vllazninë. “Kurban” të gjithë bëjnë Kamzën, është ekipi që po të binte do nxirrte më pak tifozë të pakënaqur se pse nuk do të luajnë në elitë, ndërkohë që do të bënte që shumëkush të kishte material për t’u marrë me Federatën. Ne dhe të gjithë duhet të qajmë vetëm për garën: le të qëndrojë Kamza, ta lënë të luajë dhe ta meritojë. Duhet të na interesojë gara, ajo është e shenjtë. Vllaznia dhe Teuta janë të shenjta vetëm për Shkodrën dhe Durrësin dhe le t’i trajtojnë atje si të tilla. Urojmë dhe shpresojmë të luhet deri në fund, kaq mjafton! /EDS/

Kërkesa për kod të ri
Ne ju kemi dërguar një link për të ndërruar kodin. Ju lutem kontrolloni postën tuaj elektronike