Mblidhet Ekzekutivi i FSHF-së, miratohen një sërë vendimesh përpara rifillimit të kampionatit

01 Qershor 2020

Federata Shqiptare e Futbollit vijon punën e saj jo vetëm në prag të rifillimit të kampionatit, por edhe sa u takon çështjeve të tjera të saj. Në këtë kuadër, pasditen e sotme është zhvilluar mbledhja e radhës e Komitetit Ekzekutiv, ku janë marrë në shqyrtim shumë çështje dhe miratuar disa të tjera.

Njoftimi i FSHF-së

Sot në ambientet e Federatës Shqiptare të Futbollit u zhvillua mbledhja e radhës e Komitetit Ekzekutiv. Në drejtimin e Presidentit Armand Duka, Komiteti Ekzekutiv ka diskutuar dhe miratuar të gjithë materialet e propozuara nga Departamentet e ndryshme në FSHF.

Më pas janë diskutuar dhe debatuar shumë pika të rendit të ditës, si edhe janë miratuar ristrukturimet në organigramën e FSHF dhe strategjia e Futbollit të femrave e përgatitur nga Sektori përkatës pas konsultimeve me UEFA-n.

Pikë tjetër diskutimi ishte dhe projekti më i ri i FSHF, Futbolli 5×5, për të cilin Federata do të nxisë krijimin e një kampionati kombëtar dhe ka krijuar një strukturë në Federatë për të ndjekur këtë synim ambicioz.

Në mbledhjen e sotme u vendos për fillimin nga sezoni 2020-2021 i kampionateve kombëtare U-13 dhe U-21 si dhe u miratua strategjia 2020-2025 e FSHF.

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.Grupi Balkanweb
www.balkanweb.com