Qaka zbulon Rumaninë: Nga qentë e rrugës te... Dinamo

Ti mund ta lexosh kete ne 2 min.
12 Janar 2018 17:27
Kamer Qaka është në qendër të vëmendjes në Rumasi

Kamer Qaka është në qendër të vëmendjes në Rumani. Mesfushori 22-vjeçar kuqezi i Poli Iasi, në një intervistë të dhënë për “fanatik.ro”, tregon se si u transferua nga Norvegjia në ekipin e tij aktual, por edhe shumë gjëra të tjera interesante.

“Një ditë, një agjent erdhi tek unë dhe më pyeti: ‘Çfarë do të thoshit nëse do ju thosha të vinit në Rumani? Shiko, unë kam një ekip për ju’. I thashë, ‘Sigurisht, pse jo?’. Doja një sfidë të re, të largohesha nga Norvegjia dhe të shihja vende të tjera. Natyrisht, nuk kisha dëgjuar për Poli Iasi, vetëm për Steaua dhe për Cluj. Ku i pashë? Në ndeshjet e grupeve të Champions. Kam parë ndeshjet e tyre dhe më ka pëlqyer futbolli që luanin. Për pjesën tjetër të klubeve nuk kisha dëgjuar. Edhe Dinamon e njoha kur erdha këtu”.

NDRYSHIMI MES KAMPIONATEVE

“Është e qartë, në Norvegji janë të çmenduar pas dueleve fizike. Në Rumani luhet më shumë futboll të thuash. Unë jam lojtar teknik, më pëlqen të kem topin, të pasoj. Besoj e kupton se më pëlqen më shumë këtu”.

Jeta në Rumani

“Më pëlqen shumë. Është bukur, njerëzit janë jashtëzakonisht të ngrohtë dhe të qetë. Dhe ajo që më pëlqen më shumë ... (qesh),  është vend i lirë! Pa dyshim i lirë! Unë vij nga Norvegjia dhe atje është shumë e shtrenjtë në krahasim me këtu. Mund të dalësh në qytet, të darkosh dhe të kesh më shumë kënaqësi me pak fjalë.

Çfarë nuk i pëlqen

"Unë kam qen në shtëpi dhe i dua shumë kafshët. Këtu kam parë shumë qen në rrugë. Kjo më bën të trishtohem, sa herë shoh qen në rrugë”.

Me paraqitjet e tij Qaka ka lënë përshtypje të mira dhe për këtë thotë: “Po, kështu ndihem. Ekipi më ka ndihmuar shumë, trajneri më ka lënë dorë të lirë në fushë dhe mund të bëj çfarë unë dua dhe besoj në vetvete”.

Gigi Becali, presidenti i FCSB është një prej atyre që e do me ngulm mesfushorin, pasi është impresionuar prej tij. “Kam dëgjuar për interesimin e tyre dhe më është bërë shumë qejfi për këtë. Është një klub i madh dhe kjo më kënaq, kaq mund të them për momentin. Jam i gëzuar që jam te Iasi tani”.

Te FCSB nuk është fushë me lule. Kur i thua Qakës se Gigi Becali i kritikon shumë lojtarët e tij dhe presioni është i madh, ai nuk e ka problem këtë pjesë. “E di, por nuk kam frikë. Mund të përballoj çdo lloj presioni, edhe atë te Steaua-s. Unë nuk e kam problem çfarë të tjerët thonë për mua, shoh punën time në çdo lloj situate.

Intervista vijon. Lojtari i preferuar? Qaka ende nuk i njeh të gjithë: “Një i vogël, nga Craiova, sulmuesi.. Si quhet ai?”, thotë mesfushori. “Baluta? Po ai. Është shumë i shpejtë dhe teknik, Gjithashtu finalizon shumë mirë. Edhe kolegu im, Catalin Stefanescu. Idhulli im është Marco Veratti. Ai ka gjithçka, teknikë, forcë dhe vizion në lojë”. /EDS/

Ekskluzive/ Fair Play Financiar jep efektet e para në Shqipëri

Ti mund ta lexosh kete ne 2 min.
25 Prill 2018 16:21
Një klub me emër shlyen borxhet

Që prej datës 13 maj të vitit 2012 Dinamo e Tiranës ndodhet në Kategorinë e Parë. 18 herë kampionët e vendit prej shumë problemeve, ekonomike dhe politike ndryshuan pamje, nga ekip kampion në vitin 2010 në ekip të shthurur dy vite më pas. Por, kjo situatë që prej asaj dite e deri më sot nuk ka pasur ndryshim. Blutë e kryeqytetit kanë qenë dhe kanë mbetur pjesë e Kategorisë së Parë, duke provuar edhe ethet për t’u rikthyer në elitë, por edhe ato të rënies në një kategori më poshtë.

Pesë sezone në Kategorinë e Parë dhe po bëhen gati për të gjashtin. Normalisht që nuk kanë qenë të lehtë për një ekip legjendar që u nxor nga ambientet e tij. Nga një klub shembull u kthye në një klub lagjesh. Por, duket se rimëkëmbja do të jetë e vështirë, megjithatë, një hap pozitiv është marrë që të gjithë të besojnë se diçka do të ndodhë.

Dinamo në sezonin 2010-2011 nuk ishte më klubi korrekt, duke lënë pas dore shumë pagesa që vit pas viti çuan në heqjen e pikëve në kampionat për blutë. Hera e fundit që Dinamos i janë zbritur pikë nga mosshlyerja e detyrimeve për palët e treta apo për lojtarët ka qenë sezoni 2014-2015. Por, që prej këtij sezoni çdo gjë është mbyllur dhe nuk ka më probleme të tilla.

Duke qenë se organizmat e UEFA-s dhe FIFA-s për Fair-Play-in Financiar kanë nisur të marrin masa, eduasportin.com është interesuar për këtë problem që ka shqetësuar më së shumti këtë ekip. Nga kërkimet tona jemi njohur se Dinamo e ka shlyer borxhin ndaj palëve të treta dhe lojtarëve dy vite më parë, duke shpëtuar njëherë e përgjithmonë nga penalizimet me pikë apo me pjesëmarrje në Europë.

Jo më larg se dje, Panathinaikos u ndëshkua me tre vite penalizim për shkak të borxheve, që do të thotë se klubet për t’u licencuar duhet që t’i kenë bilancet e pastra. Por, të mos harrojmë që Tirana prej borxheve të pashlyera ndaj palëve të treta nuk mori shpërblimin 215 mijë euro nga UEFA për pjesëmarrjen në Europa League.

E ardhmja – Dinamo nuk është shquar ndonjëherë në Shqipëri për tifozeri të dhunshme apo të zjarrtë, megjithatë, një grup njerëzish e mbështesin hap pas hapi, edhe pse ndodhet prej pesë vitesh në të Parën. Gjatë këtij sezoni që është drejt mbylljes, Dinamo u rendit në pesëshen e parë të grupit të Veriut, po pa arritur që të rivalizojë për kreun e tabelës, megjithatë, e ardhmja pritet të jetë ndryshe.

Bëhet me dije se një grup investitorësh janë gati që të investojnë për blutë 18 herë kampionë të Shqipërisë dhe ta nxjerrin në një kategori më lartë. Megjithatë, për momentin çdo gjë është vetëm një plan, pasi pritet që ky projekt të nisë zbatimin në muajin korrik kur do të nisë puna për ekipin e sezonit 2018-2019. /EDS/

Ekskluzive/ S'ka paqe për mesfushorin e Kombëtares, ndryshon sërish ekip

Ti mund ta lexosh kete ne 2 min.
25 Prill 2018 16:19

Nuk po gjen paqe mesfushori shqiptar, Ergys Kaçe. Shtatshkurtri nuk po kalon një moment të mirë në karrierën e tij, pasi ka gjetur shpëtim te skuadra e falimentuar e Panathinaikos-it. Ai u huazua në janar nga skuadra e PAOK-ut te skuadra tjetër greke, pasi nuk po gjente hapësira te ekipi që e nxori futbollist. Kaçe ka gjetur veten te skuadra e Panathinaikos-it, pasi ka luajtur në 8 ndeshje dhe të gjitha si titullar duke marrë minutat e munguara.

Karriera e tij shkoi për poshtë në momentin që u larguar nga skuadra e PAOK-ut dhe shkoi drejt Viktoria Plzen. Gabim i madh, pasi luajti vetëm 4 ndeshje dhe u largua para përfundimit të kontratës. Largimi me probleme nga PAOK-u dhe rikthimi te klubi grek sigurisht që nuk ishte i mirë. Drejtuesit e klubit dhe trajnerët e anashkaluan dhe shtatshkurtri nuk arriti të kthehej më si protagonist te skuadra e tij. Në fund, shpëtimi erdhi te kalimi me Panathinaikos-in. Në fakt, duket se “oazi” i tij është vetëm 6 muaj, pasi në fund të mbarimit të kontratës do të largohet nga ekipi grek. Burime të besueshme pranë lojtarit bëjnë me dije për Eduasportin.com se Kaçe do të braktisë Panathinaikosin duke parë problemet e shumta financiare që ka klubi grek.

Të njëjtat burime saktësojnë se lojtari ka nisur bisedimet me disa klube në Francë. Lojtari ka biseduar me disa klube dhe po pret përgjigje. Dera e tij është e mbyllur dhe nga PAOK-u, pasi ekipi që e nxori si futbollit nuk e do më. Kjo verë do të jetë e nxehtë dhe me plot zhvillime për Kaçrn, pasi nuk do të qëndrojë me Panathinaikosin, nuk e do PAOK-u dhe po mundohet të depërtojë në Francë. Karakteri i tij i vështirë i ka prishur jo pak punë shtatshkurtrit, pasi cilësitë futbollistike nuk vihen në diskutim./EDS

Tjetër mentalitet, komplimente Dajës dhe... sinqeritet

Ti mund ta lexosh kete ne 2 min.
25 Prill 2018 15:41
Peter Pacult të bën për vete

Peter Pacult është nga ata trajnerë që e di më së miri atë shprehjen “tërhiqe e mos e këput”. Austriaku që mori në janar drejtimin e Kukësit kërkon disiplinë në stërvitje, por nuk është se kërkon ta kthejë ekipin e tij në një repart ushtarak. Nuk mungojnë shakatë, pasi morali dhe ana psikologjike e futbollistëve është e rëndësishme. E di mirë këtë Pacult, e dinë edhe trajnerët e tjerë në vendin e tonë, por kreu i pankinës së verilindorëve nuk ka kompleke.

Në një konferencë për shtyp u paraqit me tuta të shkurta sportive. E kujt i intereson fort, sapo kishte mbaruar stërvitjen me skuadrën. Iu përgjigj pyetjeve, ndërkohë që batutat nuk i mungojnë në asnjë moment. Para ndeshjes me Skënderbeun ka menduar të zhvillojë një seancë në bregdet. Shumëkush në vendin tonë mund të mendojë: “Hë, do ia lënë ndeshjen Skënderbeut këta. Shikoni si stërviten, kanë ikur për qejf në plazh”.

“Nuk është ditë relaksi, por stërvitje e mirëfilltë. Është mënyra më e mirë për t’i larguar skuadrës presionin”, thotë Pacult në Supersport, ndërkohë që skuadra e tij vjen pas dy barazimeve me Laçin dhe i pari u kushtoi eliminimin nga Kupa e Shqipërisë. Tanimë luajnë kundër Skënderbeut dhe dëshira e trajnerit të verilindorëve është t’i shtyjë festën e titullit të korçarëve. Fjalë të mira për Ilir Dajën. “Një ndeshje e vështirë, por duam që t’ia shtyjmë festën e titullit Skënderbeut. Daja ke një ekip me kualitet dhe po e menaxhon mirë situatën pas atij dënimi që u ka dhënë UEFA. Objektivi ynë është t’u shtyjmë festën e titullit”, ka thënë mes të tjerash Pacult, që thekson se për Europën dhe lojtarët do të mendojë vetëm pasi ta sigurojnë pjesëmarrjen matematikisht. Kukësi momentalisht mban vendin dytë me 54 pikë, ndërkohë që Luftëtari ndjekës ka shtatë pikë më pak, kurse Partizani 9 pikë./EDS/

Nga Egjipti në majat e futbollit, Salah zbulon sekretet e jetës

Ti mund ta lexosh kete ne 2 min.
25 Prill 2018 15:24
Sulmuesi rrëfen detaje interesante

Mohamed Salah vazhdon të surprizojë me paraqitjet e tij mbresëlënëse në Premier League dhe Champions, me fanellën e Liverpool. Sulmuesi egjiptian po kalon një formë të jashtëzakonshme pas transferimit nga Roma në “Anfield”. 25-vjeçari realizoi dy gola në fitoren (5-2) e gjysmëfinales së parë të Ligës së Kampionëve ndaj ish-ekipit të tij, Romës.

Në një intervistë për CNN, Salah ka rrëfyer jetën e tij përtej futbollit, në veçanti për atdheun e tij, Egjiptin. I pyetur se si arrin t’a mbajë gjithë këtë presion mbi kurriz, ai tha se nuk ndjen asnjë të tillë, përkundrazi ndihet i lehtësuar.

Ushqimi

“Ushqimi është shumë i rëndësishëm, është pjesë e lojës. Më ka ndihmuar shumë të rikuperohem, të fle më mirë dhe trupin tim që të përshtatet më shpejt. Për shkak se nuk kam ndonjë yndyrë në trupin tim, mund të ha çfarë të dua. Gjithashtu nuk pi, kështu që është mirë. Kur kthehem në Egjipt, i them shokut tim që të më blejë kushari kur të vijë të më marrë në aeroport. Vendos kapuçin në kokë dhe futem në makinë për të ngrënë menjëherë.

Kushari është ushqim tradicional në Egjipt, e cila përbëhet nga orizi, makarona dhe thjerrëzat. Duket që ka pasur efekt fantastik tek Salah, i cili ka shënuar 43 gola këtë sezon me fanellën e “The Reds”.

Jeta dhe Egjipti

“Nëse flasim për Egjiptin, ne jemi 100 milionë. Duhet të jem i natyrshëm dhe të mos bëj asgjë të rreme, të mashtroj në mediat sociale, në intervista dhe në jetë. Kjo është jeta ime, është tepër e thjeshtë. Nuk ka asgjë të komplikuar. Nuk kam asgjë për të bërë gjatë ditës por përgjegjësinë e kam në fund. Duhet t’a marrësh me qetësi dhe të ecësh përpara. Unë nuk jam nervoz për këtë. Është pak e vështirë, pasi nuk keni lirinë që të bëni gabime, diçka të gabuar. Ky është presioni, por kur ju ndiheni nën presion për shumë vite, mund të biesh dakord me të. Është në rregull.

Mohmaed Salah ka shënuar 31 gola (9 asiste)  në 31 ndeshje në Premier league deri më tani ndërsa në kompeticionet evropiane, në 10 takime ka shënuar 10 gola dhe ka dhënë 4 asiste. /EDS/