“Skaneri” i Abilaliajt: Busic lider. Alves? Kush e blen atë...

Ti mund ta lexosh kete ne 1 min.
12 Janar 2018 09:40
Ish-sulmuesi, tashmë në rolin e opinionistit

Në mbrojtje Flamurtari është “top”, teksa ka pësuar më pak se gjithë ekipet e tjera të Superiores në 16 javët e para të kampionatit. Në sulm lideri është Tomislav Busic, autor i gjashtë golave, ndërkohë që Danilo Alves luan më së shumti në krah dhe nuk është se i ka të mira “marrëdhëniet” me golin (ka shënuar vetëm kundër Lushnjes).

Dyshja e sulmit ka kaluar në “lupën” e vlonjatit Arbër Abilaliaj, një futbollist që ka një eksperiencë të madhe në Superiore.

Alves të shitet, po kush e blen? Alves-in e penalizojnë shumë golat”, kështu e nis ish-sulmuesi fjalën e tij, ndërkohë që më tej shton: “Trajneri Duro i mat sulmuesit me gola dhe asiste. Alves është një lojtar i mirë, por nuk po e zgjidh ngërçin që ka. Çfarë nuk shkon? Nuk është për filozofinë e trajnerit. Kjo e penalizon atë disi. Është kualitativ, krijon volum loje, por ka dy vite te Flamurtari dhe ka shënuar shumë pak”.

Abilaliaj, në intervistën e dhënë për “Panorama Sport”, jep një mendim edhe për Bushic: “Ka një mesatare të mirë. Është një lojtar tejet i rëndësishëm për ekipin, kjo për eksperiencën dhe inteligjencën që ka, por edhe për golat që ka realizuar. Ka profilin e një lojtari apo kapiteni që mund ta çojë Flamurtarin në Kupat e Europës”.

Ekskluzive/ Fair Play Financiar jep efektet e para në Shqipëri

Ti mund ta lexosh kete ne 2 min.
25 Prill 2018 16:21
Një klub me emër shlyen borxhet

Që prej datës 13 maj të vitit 2012 Dinamo e Tiranës ndodhet në Kategorinë e Parë. 18 herë kampionët e vendit prej shumë problemeve, ekonomike dhe politike ndryshuan pamje, nga ekip kampion në vitin 2010 në ekip të shthurur dy vite më pas. Por, kjo situatë që prej asaj dite e deri më sot nuk ka pasur ndryshim. Blutë e kryeqytetit kanë qenë dhe kanë mbetur pjesë e Kategorisë së Parë, duke provuar edhe ethet për t’u rikthyer në elitë, por edhe ato të rënies në një kategori më poshtë.

Pesë sezone në Kategorinë e Parë dhe po bëhen gati për të gjashtin. Normalisht që nuk kanë qenë të lehtë për një ekip legjendar që u nxor nga ambientet e tij. Nga një klub shembull u kthye në një klub lagjesh. Por, duket se rimëkëmbja do të jetë e vështirë, megjithatë, një hap pozitiv është marrë që të gjithë të besojnë se diçka do të ndodhë.

Dinamo në sezonin 2010-2011 nuk ishte më klubi korrekt, duke lënë pas dore shumë pagesa që vit pas viti çuan në heqjen e pikëve në kampionat për blutë. Hera e fundit që Dinamos i janë zbritur pikë nga mosshlyerja e detyrimeve për palët e treta apo për lojtarët ka qenë sezoni 2014-2015. Por, që prej këtij sezoni çdo gjë është mbyllur dhe nuk ka më probleme të tilla.

Duke qenë se organizmat e UEFA-s dhe FIFA-s për Fair-Play-in Financiar kanë nisur të marrin masa, eduasportin.com është interesuar për këtë problem që ka shqetësuar më së shumti këtë ekip. Nga kërkimet tona jemi njohur se Dinamo e ka shlyer borxhin ndaj palëve të treta dhe lojtarëve dy vite më parë, duke shpëtuar njëherë e përgjithmonë nga penalizimet me pikë apo me pjesëmarrje në Europë.

Jo më larg se dje, Panathinaikos u ndëshkua me tre vite penalizim për shkak të borxheve, që do të thotë se klubet për t’u licencuar duhet që t’i kenë bilancet e pastra. Por, të mos harrojmë që Tirana prej borxheve të pashlyera ndaj palëve të treta nuk mori shpërblimin 215 mijë euro nga UEFA për pjesëmarrjen në Europa League.

E ardhmja – Dinamo nuk është shquar ndonjëherë në Shqipëri për tifozeri të dhunshme apo të zjarrtë, megjithatë, një grup njerëzish e mbështesin hap pas hapi, edhe pse ndodhet prej pesë vitesh në të Parën. Gjatë këtij sezoni që është drejt mbylljes, Dinamo u rendit në pesëshen e parë të grupit të Veriut, po pa arritur që të rivalizojë për kreun e tabelës, megjithatë, e ardhmja pritet të jetë ndryshe.

Bëhet me dije se një grup investitorësh janë gati që të investojnë për blutë 18 herë kampionë të Shqipërisë dhe ta nxjerrin në një kategori më lartë. Megjithatë, për momentin çdo gjë është vetëm një plan, pasi pritet që ky projekt të nisë zbatimin në muajin korrik kur do të nisë puna për ekipin e sezonit 2018-2019. /EDS/

Ekskluzive/ S'ka paqe për mesfushorin e Kombëtares, ndryshon sërish ekip

Ti mund ta lexosh kete ne 2 min.
25 Prill 2018 16:19

Nuk po gjen paqe mesfushori shqiptar, Ergys Kaçe. Shtatshkurtri nuk po kalon një moment të mirë në karrierën e tij, pasi ka gjetur shpëtim te skuadra e falimentuar e Panathinaikos-it. Ai u huazua në janar nga skuadra e PAOK-ut te skuadra tjetër greke, pasi nuk po gjente hapësira te ekipi që e nxori futbollist. Kaçe ka gjetur veten te skuadra e Panathinaikos-it, pasi ka luajtur në 8 ndeshje dhe të gjitha si titullar duke marrë minutat e munguara.

Karriera e tij shkoi për poshtë në momentin që u larguar nga skuadra e PAOK-ut dhe shkoi drejt Viktoria Plzen. Gabim i madh, pasi luajti vetëm 4 ndeshje dhe u largua para përfundimit të kontratës. Largimi me probleme nga PAOK-u dhe rikthimi te klubi grek sigurisht që nuk ishte i mirë. Drejtuesit e klubit dhe trajnerët e anashkaluan dhe shtatshkurtri nuk arriti të kthehej më si protagonist te skuadra e tij. Në fund, shpëtimi erdhi te kalimi me Panathinaikos-in. Në fakt, duket se “oazi” i tij është vetëm 6 muaj, pasi në fund të mbarimit të kontratës do të largohet nga ekipi grek. Burime të besueshme pranë lojtarit bëjnë me dije për Eduasportin.com se Kaçe do të braktisë Panathinaikosin duke parë problemet e shumta financiare që ka klubi grek.

Të njëjtat burime saktësojnë se lojtari ka nisur bisedimet me disa klube në Francë. Lojtari ka biseduar me disa klube dhe po pret përgjigje. Dera e tij është e mbyllur dhe nga PAOK-u, pasi ekipi që e nxori si futbollit nuk e do më. Kjo verë do të jetë e nxehtë dhe me plot zhvillime për Kaçrn, pasi nuk do të qëndrojë me Panathinaikosin, nuk e do PAOK-u dhe po mundohet të depërtojë në Francë. Karakteri i tij i vështirë i ka prishur jo pak punë shtatshkurtrit, pasi cilësitë futbollistike nuk vihen në diskutim./EDS

Tjetër mentalitet, komplimente Dajës dhe... sinqeritet

Ti mund ta lexosh kete ne 2 min.
25 Prill 2018 15:41
Peter Pacult të bën për vete

Peter Pacult është nga ata trajnerë që e di më së miri atë shprehjen “tërhiqe e mos e këput”. Austriaku që mori në janar drejtimin e Kukësit kërkon disiplinë në stërvitje, por nuk është se kërkon ta kthejë ekipin e tij në një repart ushtarak. Nuk mungojnë shakatë, pasi morali dhe ana psikologjike e futbollistëve është e rëndësishme. E di mirë këtë Pacult, e dinë edhe trajnerët e tjerë në vendin e tonë, por kreu i pankinës së verilindorëve nuk ka kompleke.

Në një konferencë për shtyp u paraqit me tuta të shkurta sportive. E kujt i intereson fort, sapo kishte mbaruar stërvitjen me skuadrën. Iu përgjigj pyetjeve, ndërkohë që batutat nuk i mungojnë në asnjë moment. Para ndeshjes me Skënderbeun ka menduar të zhvillojë një seancë në bregdet. Shumëkush në vendin tonë mund të mendojë: “Hë, do ia lënë ndeshjen Skënderbeut këta. Shikoni si stërviten, kanë ikur për qejf në plazh”.

“Nuk është ditë relaksi, por stërvitje e mirëfilltë. Është mënyra më e mirë për t’i larguar skuadrës presionin”, thotë Pacult në Supersport, ndërkohë që skuadra e tij vjen pas dy barazimeve me Laçin dhe i pari u kushtoi eliminimin nga Kupa e Shqipërisë. Tanimë luajnë kundër Skënderbeut dhe dëshira e trajnerit të verilindorëve është t’i shtyjë festën e titullit të korçarëve. Fjalë të mira për Ilir Dajën. “Një ndeshje e vështirë, por duam që t’ia shtyjmë festën e titullit Skënderbeut. Daja ke një ekip me kualitet dhe po e menaxhon mirë situatën pas atij dënimi që u ka dhënë UEFA. Objektivi ynë është t’u shtyjmë festën e titullit”, ka thënë mes të tjerash Pacult, që thekson se për Europën dhe lojtarët do të mendojë vetëm pasi ta sigurojnë pjesëmarrjen matematikisht. Kukësi momentalisht mban vendin dytë me 54 pikë, ndërkohë që Luftëtari ndjekës ka shtatë pikë më pak, kurse Partizani 9 pikë./EDS/

Panucci afron një lojtar të ri në Kombëtare, mesfushori pret ftesën

Ti mund ta lexosh kete ne 2 min.
25 Prill 2018 11:56
E zbulon EDS

Trajneri i Kombëtares së Shqipërisë, Christian Panucci, po mendon për alternativat e reja që do të afrojë në skuadër për ndeshjen miqësore kundër Ukrainës. Takim ky që do të zhvillohet më 2 qershor në Zvicvër, një sfidë që i shërben teknikut italian të bëjë autokritikë pas asaj paraqitjeje zhgënjyese me Norvegjinë. Me nordikët skuadra shqiptare u mposht me rezultatin 0-1 në stadiumin “Elbasan Arena” dhe nuk bëri asgjë në fushën e lojës duke u paraqitur shumë dobët.

Numri një i stolit të Shqipërisë po mendon për lojtarët që do të afrojë në Kombëtare. Ai ka eksperimentuar duke afruar emra të rinj dhe duket se ka gati dhe lëvizjen e radhës. Italiani pritet që t’i dërgojë një ftesë për takimin kundër Zvicër, mesfushorit Fatjon Andonit. Ky i fundit luan me ekipin e Larissas dhe është një titullar stabël i këtij ekipi. Andoni është përfolur prej kohësh, por nuk është grumbulluar. Ndeshja kundër Ukrainës mund të jetë shansi i tij. Burime të besueshme pranë trajnerit Panucci për Eduasportin.com bëjnë me dije se tekniku po monitoron gjendjen e tij dhe me shumë mundësi do e grumbullojë për takimin kundër Ukrainës.

Andoni ka lindur në Greqi dhe nuk ka luajtur me asnjë kombëtare. 26-vjeçari ka një karrierë të pasur në Greqi, pasi ka luajtur me disa ekipe atje. Mesfushori ka vite që është stabilizuar në kampionatin grek dhe luan si titullar në çdo ekip. Momentalisht, lojtari po luan me ekipin e Larissa-s. Ai ka zhvilluar 22 ndeshje këtë sezon dhe të gjitha si titullar. Ekipi grek ndodhet në vendin e 12-të në kampionatin helen të futbollit dhe nuk rrezikon rënien nga Kategoria. Andoni ka parametra fizike shumë të mira, pasi është 190 cm i gjatë. Lojtari nuk shquhet për shënimin e golave, pasi këtë sezon ka arritur të përshëndesë vetëm 1 herë rrjetën. /EDS