REZULTATET LIVE
Shiko listen e plote
Mesfushori i vlonjatëve "rrëfen" Superioren

Useini: Më ka surprizuar gara, ky Flamurtar për titull... në Maqedoni

12 Janar 2018 15:02

Muhamedin Useini është një nga afrimet më cilësore të Flamurtarit në verë. Mesfushori i ardhur nga Renova, i cili më parë ka luajtur edhe me Shkëndijën e Tetovës, në një intervistë të dhënë për “Eduasportin.com”, flet për ecurinë e deritanishme, “sekretet” e Flamurtarit dhe gjithçka ndodh në Superiore.

Kur vjen puna te objektivat, në Vlorë përgjigja është standarde: “Objektivi ynë, ndeshja e radhës”. Për titullin asnjë nuk dëshiron të flasë, por nëse Flamurtari do konkurronte në Maqedoni, do kishte shanse ta mbyllte i pari, por duke rivalizuar ashpër me Shkëndijën, që konsiderohet ekipi më i mirë atje.

-Muhamedin, jeni prej disa muajsh pjesë e Flamurtarit. Si e gjykoni ecurinë e klubit tuaj dhe tuajën personale?

Si grup kemi ecur mjaft mirë, edhe pse gjithmonë mendoj se na mungojnë disa pikë. Si çdo futbollist, asnjëherë nuk mund të jesh i kënaqur nga vetja 100%, edhe pse jam i lumtur që u ambientova mjaft shpejt. Mendoj se kam bërë mirë këta pesë muaj dhe shpresoj të mund të jap akoma më shumë.

-Në gjithë përballjet e mëparshme, veç arbitrave, kush ka qenë rivali që ju ka hapur më shumë punë?

S’dua fare t’i komentoj arbitrat, e dinë shumica situatën. Sa i takon rivalit që na ka hapur punë është Skënderbeu, ekip ndaj të cilit duhet shumë impenjim për ta mposhtur.

-Sa ndikon në ecurinë e ekipit fakti që jeni shumë lojtarë që vini nga kampionati maqedonas?

Normale ndikon, pasi jemi shumë lojtarë që kemi luajtur bashkë ose kundër ndër vite.

-Ka diçka që ju ka surprizuar në kampionatin tonë?

Surprizë në krahasim me kampionatin e Maqedonisë është gara. Këtu nuk ke ndeshje të lehta, duhet shumë punë për 3 pikët në çdo ndeshje, pavarësisht kundërshtarit.

-Nëse ky ekip, i tanishmi, do konkurronte në kampionatin maqedonas, sa shanse do kishte për titullin kampion?

Do kishim shanse reale për t’u shpallur kampionë, por do ishte luftë e ashpër me Shkëndijën, ekipi më i mirë në Maqedoni.

-Po me përforcimet e bëra, a mendoni se mund ta rivalizoni Skënderbeun për trofeun?

Që në fillim të kampionatit i kemi marrë ndeshjet një e nga një dhe tani kemi atë mendim që në çdo ndeshje të jepet maksimumi, pastaj në fund bëhen llogaritë. Kurse për përforcimet besoj do ngrenë kualitetin e lojës, pasi që bëhet fjalë për futbollistë cilësorë.

-Grupi i bashkuar, harmonia në skuadër, duken evidente te Flamurtari. Çfarë ka tjetër të veçantë ekipi juaj?

Mund të them grintën dhe etjen për fitore.

-Afrimet e janarit janë lojtarë që ju i njihni, pasi i keni pasur në fushë si kundërshtarë në të shkuarën. Mund të na zbuloni diçka rreth tyre?

Të gjitha përforcimet janë super. Çuna të urtë, punëtorë dhe me shumë kualitet brenda vetes. Besoj që në fushë do i shohin të gjithë dhe do binden për këtë.

-Së fundmi, një mesazh për tifozët, por edhe për rivalët...

Të mbështesin ekipin, siç kanë bërë deri tani, sepse futbolli luhet për tifozët. Ne do japim më të mirën për fanellën dhe qytetin, sepse Flamurtari meriton të jetë vetëm lart.

 

Jeni i lutur të hyni në llogari që të lini një koment
Roma kërkon 50 mln euro dhe një lojtar për boshnjakun dhe Emerson

Dzeko pranon ofertën e Chelsea-t, e bindi...

22 Janar 2018 19:22

Raportet në Itali sugjerojnë se sulmuesi Edin Dzeko ka rënë dakord me një kontratë me Chelsea-n në vlerë prej 8 milionë eurosh për sezon. Blutë po kërkojnë të nënshkruajnë përveç sulmuesit edhe me shokun e tij te verdhekuqtë Emerson Palmieri. Tani “Tuttomercatoweb” raporton se është arritur një marrëveshje për 50 milionë eurosh plus 10 milionë euro shpërblime për dy lojtarët.

“Tuttomercatoweb” beson se Dzeko ka pranuar për t’u realizuar ky operacion prej faktit se tani rroga e tij do të dyfishohet, nga 4.5 mln euro në vit në 8 mln euro. Përveç kësaj, mësohet se telefonata nga trajneri i Chelsea-t, Antonio Conte ishte vendimtar në bindjen e sulmuesit për t’i thënë “po” bluve. Të dyja klubet aktualisht janë duke punuar detajet e fundit dhe shpresojnë të arrijnë një marrëveshje përfundimtare në orët e ardhshme. Gjithashtu Roma kërkon nga kampionët e Anglisë përveç të tjerash edhe sulmuesin Batshuayi me huazim për gjashtë muaj. /EDS/

Jeni i lutur të hyni në llogari që të lini një koment
EDS e paralajmëroi dje lëvizjen

Luftëtari largon mbrojtësin vlonjat

22 Janar 2018 19:11

Klubi gjirokastrit ishte i mbushur mbi kapacitetin që duhet dhe në këtë mënyrë ka vendosur që të bëjë disa largime. Përpos huazimeve, apo ndërprerjeve të kontratave në fillim të muajit janar, sot ka shkëputur kontratën me një tjetër lojtar.

EDS e publikoi dje lajmin se Valdo Zeqaj do të ndryshonte ambient në ditët e ardhshme, teksa sot klubi bluzi ka konfirmuar ndërprerjen e marrëdhënieve mes palëve. Qendërmbrojtësi vlonjat nga dita e sotme është i lirë për të vazhduar kontratën në një klub tjetër.

Njoftimin e ka dhënë zyra e shtypit të Luftëtarit, e cila ka njoftuar se nga sot Zeqaj nuk është më pjesë e skuadrës. Ai u afrua gjatë merkatos së verës, por nuk arriti që të kapë vendin si titullar në formacionin e trajnerit uruguaian që u largua, por edhe të Hasan Likës. E ardhmja e Zeqajt pritet të jetë Superiorja, por nuk kanë munguar kërkesat edhe nga klube të së Parës. /EDS/

Jeni i lutur të hyni në llogari që të lini një koment
Turqit të papërmbajtshëm në merkato

“Çmendet” Galatasaray, kërkon lojtarin e West Ham

22 Janar 2018 18:54

Ardhja e Fatih Terim në krye të Galatasaray, normalisht që ka sinjalizuar një merkato të fuqishme për të arritur objektivat e gjigantit turk. Në merkaton e janarit kërkesat janë të shumta, saqë arrijnë deri në Angli, në Premier Legue.

Ganezi i West Ham United është vënë në shënjestrën e Terim, i cili e do mesfushorin e majtë në radhët e Galatasaray. Andre Ayew ka kontratë me londinezët deri në përfundimin e sezonit 2018-2019. Praktikisht edhe një vit e gjysmë.

Por, turqit e kanë kërkuar me ngulm, teksa pritet që të arrihet marrëveshja e huazimit brenda këtij muaji. Në tavolinë verdhekuqtë e Stambollit kanë ofruar edhe blerjen e mesfushorit në fund të këtij sezoni, gjithnjë në rast se bind trajnerin. /EDS/

Jeni i lutur të hyni në llogari që të lini një koment
Çështja shkon te Dhoma Kombëtare e Zgjidhjes së Konflikteve në FSHF

Ekskluzive/ Bylis në telashe me mesfushorin

22 Janar 2018 18:25

Ballshiotët këtë vit si asnjëherë tjetër, vetëm të larguar zyrtarisht dhe lojtarë që duan të largohen në ditët në vijim. Pas ikjes së dy vëllezërve Fejzaj dhe sulmuesit kamernuas Nteppe, në stërvitje prej ditësh nuk shihen dy vëllezërit Vatnikaj, ndërsa sot zyrtarisht ka kërkuar largimin mesfushori Vesel Limaj.

EDS zbulon zyrtarisht kërkesën e mesfushorit 21-vjeçar në Dhomën Kombëtare të Zgjidhjes së konflikteve pranë FSHF-së, i cili ka kërkuar që të largohet nga ballshiotët dhe prishjen e njëanshme të kontratës.

Në bazë të faksimiles së mëposhtme vërtetohet se ai nuk do të bëjë kthim pas, pra të riveshë fanellën e mallakastriotëve për pjesën e mbetur të kontratës. Mesfushori ka dalë nga akademia e Hamburgut në Gjermani dhe para se të transferohej në Shqipëri, ai ka veshur fanellën e Horn në Ligën e Parë në Austri.

Në muajin gusht ai kaloi provën te ballshiotët dhe ka firmosur kontratë 2-vjeçare, pra deri më 31 maj 2019. Por, Limaj tashmë ka marrë tjetër vendim për karrierën e tij. Megjithatë, do të jetë DHZK-ja që do të japë përgjigjen përfundimtare për këtë çështje. /EDS/

Jeni i lutur të hyni në llogari që të lini një koment