Vllaznia nuk e mbyll merkaton... në dalje

Ti mund ta lexosh kete ne 1 min.
12 Janar 2018 23:37
Vllaznia është duke bërë afrime të bujshme për pjesën e mbetur të kampionatit

Vllaznia është duke bërë afrime të bujshme për pjesën e mbetur të kampionatit. Kontrata të majme, teksa drejtuesit duan që të dalin nga kriza e fazës së parë dhe të kërkojnë pikët e humbura për të qëndruar në kategori apo çuditërisht të kërkojnë Europën.

Shkodranët kanë afruar Sukajn, Berishën, Mersinin e Malotën, kërkojnë Pero Pejiçin ndërsa nuk kanë mbyllur ende merkaton në dalje. EDS mëson ekskluzivisht se do të ketë dhe dy shkodranë që do të lënë skuadrën.

Bëhet fjalë për portierin e talentuar Alen Sherri, të cilit do t’i jepet hapësira në një skuadër tjetër që të rrisë cilësinë e tij, gjithnjë në formë huazimi. Ndërsa të njëjtën gjë do të bëjë edhe me Arsid Krujën. Ky i fundit nuk po përjeton formë të mirë sportive, gjë që detyron klubin ta huazojë. Gjithçka për momentin është në kuadrin e bisedimeve brenda skuadrës, por që në orët në vijim mund të jetë fakt i kryer. /EDS/

Gjyqi në Lozanë, Skënderbeu nuk beson te drejtësia e UEFA-s

Ti mund ta lexosh kete ne 2 min.
26 Prill 2018 21:39
Klubi korçar e shpreh hapur

Skënderbeu sot ka qenë në gjyq, normalisht ka qenë faza dëgjimore për shkallën e Apelit të UEFA-s ku dëshmuan lojtarë dhe ish-lojtarë të korçarëve për t’u mbrojtur nga dënimi që tashmë është dhënë, 10 vite pezullim nga kompeticionet e UEFA-s dhe 1 milionë euro gjobë.

Korçarët edhe pse kanë dëshmuar sot për më tepër se 6 orë, sërish nuk kanë shpresa se drejtësia do të përcaktohet menjëherë nga UEFA, apo nëse do të merret një vendim më i butë për ta.

Që do të thotë se kjo çështje në bazë të deklaratës për shtyp të korçarëve, e botuar pak minuta më parë në faqen e tyre zyrtare në Facebook, tregon se nuk kanë besim te drejtësia e UEFA-s. Ndërsa pritet që t'i drejtohen shumë shpejtë CAS-it, ku kanë shpresa që t'iu rikthehet dinjiteti i tyre. /EDS/

Më poshtë mund të lexoni deklaratën e klubit korçar:

Deklaratë për shtyp!
Sot, më datë 26.04.2018, është zhvilluar seanca dëgjimore në komisionin e apelit pranë UEFA-s, lidhur me dënimin disiplinor ndaj Klubit të Futbollit ‘Skënderbeu’ me përjashtim për një periudhë 10 vjeçare nga kompeticionet europiane dhe caktimin e një mase disiplinore financiare në vlerën 1 milion euro nga komisioni i Kontrollit, Etikës dhe Disiplinës të UEFA-s.
Përfaqësuesit tanë ligjorë, kanë argumentuar sërish para trupave gjykuese të UEFA-s mospërfshirjen dhe pafajësinë e plotë të klubit në veprimtaritë e pretenduara nga Inspektorët e Disiplinës të UEFA-s.
Në seancën e zhvilluar sot në Lozanë, para panelit kanë dëshmuar pjesëtarë të stafit drejtues, lojtarë aktualë dhe ish lojtarë të Skënderbeut, të cilët kanë mohuar kategorikisht akuzat e ngritura nga inspektorët e UEFA-s.
Duke marrë në konsideratë egzistencën e një marrëdhënie institucionale ndërmjet organeve gjykuese, Klubi i Futbollit ‘Skënderbeu’ rikonfirmon edhe njëherë mosbesimin për drejtësi në këtë fazë fillestare të proçesit dhe shprehim edhe njëherë bindjen e plotë se strategjia e ndjekur nga bashkëpunëtorët tanë do të japë rezultatet e pritura në CAS, (Gjykatën e Arbitrazhit Sportiv).
Me respekt,
Zyra për shtyp
KF Skënderbeu

Bilali kërcënon Kamzën dhe zbulon të ardhmen

Ti mund ta lexosh kete ne 2 min.
26 Prill 2018 20:13
Mbrojtësi optimist

Teuta vazhdon me përgatitjet intesive në terren në kuadër të përballjes me Kamzën në “Niko Dovana”. Përballë është një kundërshtar i fortë, pavarësisht pozicionit që ka në klasifikim. Pas hapit fals në Vlorë, durrsakët kërkojnë kthesën dhe kundër kamzalinjve nuk mendojnë asnjë rezultat tjetër përveç fitores. Fakti, që përballë është një kundërshtar direkt për mbijetesë, i jep një vlerë të dyfishtë kësaj ndeshje.

“Humbjen me Flamurtarin e kemi hedhur pas krahëve, jemi fokusuar totalisht tek ndeshja me Kamzën. Është një kundërshtar i fortë, por të gjitha enegjitë tona janë përqendruar aty. Po e përgatisim me kujdes me synimin e vetëm për ta fituar, pasi kjo ndeshje është e një rëndësie të madhe për ne. Mund të them, se ne e konsiderojmë si finale”, tha mbrojtësi Amir Bilali në intervistën për “Eduasportin.com”.

Rikthehet pasiguria në mbrojtje – “Kishim një ecuri mjaft të mirë, ku në tre ndeshjet e fundit nuk pësonim. Ndoshta kaluam pak në eufori nga fakti që ishim në avantazh, por Flamurtari përmbysi gjithçka shpejt dhe prej gabimeve tona. Ne patëm sërish mundësi për ta hapur ndeshjen, por gabuam edhe nga pika e bardhë e penalltisë. Më pas gjithçka u bë më e vështirë.

Mbijetesa – “Gara është e fortë, diferencat janë shumë të vogla, megjithatë ne besojmë tek forca e grupit dhe jemi të sigurt, se do të qëndrojmë në Kategorinë Superiore. Unë e kam thënë që në fillim kur nënshkrova me Teutën, që mbijetesën nuk e diskutojmë”.

Mungesa në formacion – “Në fakt në ndeshjet e fundit kam patur një shqetësim ndaj kam qenë në stol, por që nga janari kur u bashkova me ekipin, pothuajse kam luajtur rregullisht dhe jam i kënaqur”.

E ardhmja – “Të them të drejtën tani jam i fokusuar vetëm tek Teuta dhe ndeshjet e mbetura. Objektivi im është të jap më të mirën për fanellën që mbaj veshur për të arritur objektivat. Më pas, kur të përfundojë kampionati do të diskutojmë me drejtuesit për të vendosur, se çfarë do të bëjmë, por do të më pëlqente të isha sërish pjesë e Teutës”. /EDS/

Goditje e rëndë për Partizanin, humbet një nga lojtarët më të fortë

Ti mund ta lexosh kete ne 1 min.
26 Prill 2018 20:07
Po përjetonte formën më të mirë

Dy ndeshje të humbura dhe rrezik dështimi për rrugën drejt Europës, por edhe ky lajm i keq nuk i duhej Partizanit ditën e sotme. Në momentin më delikat, të kuqtë humbasin sulmuesin e ardhur me shumë bujë gjatë merkatos së janarit. Lucas Cardoso. Braziliani u nxor me barelë gjatë ndeshjes kundër Skënderbeut, duke i lënë vendin Bardhi-t, por që dëmtimi nuk u duk shumë serioz në fillim.

Megjithatë, nuk mbeti në hije, pasi mjekët dhe vetë lojtari kërkuan një diagnozë të imtësishme të dëmtimit, por që në fund ka rezultuar e frikshme për të dyja palët. Cardoso ka këputur ligamentin e gjurit dhe minimalisht do të qëndrojë gjashtë muaj larg fushave.

Kjo është situatë është e dyta brenda dy vitesh në klubin e kuq. Tetorin e shkuar ishte Arbnor Fejzullahu që braktisi skuadrën, ndërsa në fund të këtij sezoni, kur askush nuk e mendonte diçka të tillë, është Cardoso që do të humbasë aktivizimin. Kjo është një humbje e konsiderueshme për këtë ekip që gjatë këtij sezoni ka treguar se ka shumë mangësi në vijën e parë të sulmit.

Kur të gjithë shpresonin se me rikthimin e Edgar Çanit në fushë do të ndryshonte gjithçka për mirë, tashmë ky lajm i keq rëndon së tepërmi dhe stafin teknik, i cili duhet të bëjë zgjidhje të tjera për të plotësuar hapësirën e lënë bosh nga braziliani, i cili në 11 ndeshje ka realizuar 3 gola me Partizanin.

Këtë fundjavë të kuqtë do të udhëtojnë drejt Lushnjes, ndërsa në katër në pesë javët e fundit të kampionatit i presin sfida mjaft të forta për rrugën drejt Europa League, që mbetet e vetmja shpresë për të shpëtuar sezonin. /EDS/

'Këpuca e Artë', Sowe provokon Gurin para supersfidës

Ti mund ta lexosh kete ne 2 min.
26 Prill 2018 19:48
Skënderbeu – Kukësi luhet të dielën

Skënderbeu mori një fitore të vuajtur, por me shumë shije në “Selman Stermasi” kundër Partizanit dhe i afrohet me një hap më shumë titullit kampion për herën e tetë në historinë e tyre si klub dhe të shtatën brenda tetë viteve të fundit.

Bardhekuqtë do të luajnë këtë fundjavë ndeshjen e javës së 31 të kampionatit kundër Kukësit, rivalit që po e ndjek nga pas në tabelën e klasifikimit. Të besuarve të Ilir Dajës iu bën punë vetëm fitorja, në mënyrë që këtë javë të shpallen kampionë matematikisht të Superiores. Në rast barazimi apo humbjeje, do t’iu duhet një ose më shumë se një takim për të marrë titullin.

Megjithatë, pas shumë problemeve të dëmtimeve, trajneri Ilir Daja ka marrë lajmin e mirë për rikthimin e sulmuesit kryesor të skuadrës, Ali Sowe. Veç lojtarit nga Gambia, rikthehet dhe James Adeniyi, i cili mungoi në sfidën kundër Partizanit. Lajm kryesor është dhe rikthimi i Orges Shehit në katërkëndor pas disa javësh mungesë. Durrsaku nuk ka qenë në gjendje të mirë fizike, ndërkohë që këtë javë do të jetë në dispozicion të bardhekuqve që nga minuta e parë.

Golashënuesi - Afrikani Sowe ka shënuar 14 gola në kampionat me korçarët, teksa është i dyti në listë pas Gurit të Kukësit që ka realizuar 15 rrjeta. Lojtari 23-vjeçar nga Gambia ka folur para sfidës kundër Kukësit, ku ai ka treguar çdo gjë rreth dëmtimit të supozuar, por edhe për garën me Gurin për “Këpucën e Artë” të Superiores këtë sezon.

“Analizat për atë që dyshonim treguan se unë nuk kam asnjë problem. Ky është një lajm i mirë për mua dhe skuadrën në këtë moment të kampionatit. Kjo do të thotë që nuk pengesa për procesin stërvitor. Do të jem me grupin dhe besoj se dhe në fushë për ndeshjen e radhës”.

“Do të hyjmë për fitore kundër Kukësit, ashtu si në çdo ndeshje tjetër. Kam siguri të plotë se ne do të fitojmë dhe do të festojmë, sepse askush nuk mund të na e shtyjë festën për një tjetër datë”.

I uroj suksese kujtdo që është në garë për këtë trofe, por unë e kam thënë se do ta fitoj ‘Këpucën e Artë’. Le të bëhet më e mira në këtë ndeshje që do të jemi ballë për ballë”, përfundoi Sowe, i cili sfidon Gurin në ndeshjen e së dielës që do të nisë në orën 19:00 në stadiumin “Skënderbeu” të qytetit të Korçës. /EDS/