Zbuloni 12 yjet që do të luajnë për herë të parë në Kampionatin Botëror

Ti mund ta lexosh kete ne 4 min.
6 Prill 2018 20:46

Kupa e Botës është gjëja më e madhe në kalendarin e futbollit, eventi më i dashur për të gjithë, por ky kompeticion zhvillohet vetëm një herë në katër vjet dhe për të marrë pjesë, nuk është e lehtë. Këta 12 lojtarë janë të gjithë yjet globalë, por “Rusi 2018” do të jetë Kampionati Botëror i parë për ta...

Marco Asensio (Spanjë)

Mesfushori i Real Madrid, Marco Asensio, ka mahnitur me performancat e tij në vitin e fundit dhe ai premton shumë për të ardhmen. Në Rusi do të ketë shansin për të treguar aftësinë e tij në skenën botërore, për herë të parë këtë verë. Ai ishte në skuadrën e “Euro 2016” të Spanjës, por në fund nuk u grumbullua. Megjithatë, tani ai është pjesë e një ekipi, që kërkon të bëjë ndryshime pas dështimit në vitin 2014.

Sadio Mane (Senegal)

Sadio Mane do të shpresojë, se ai mund të përsërisë arritjet e skuadrës në vitin 2002, i cili tronditi planetin duke arritur në çerekfinale të Kupës së Botës. Kombi afrikan ka munguar në këtë fazë që nga ajo kohë, por një brez i ri talentesh të shkëlqyer, prej të cilëve Mane, është gati dhe premton sukses.

Gabriel Jesus (Brazil)

Kur ishte pjesë e Palmeiras dhe vetëm 17 vjeç, Gabriel Jesus ndihmoi të lyente rrugët e Sao Paulos me ngjyrat e Brazilit si pjesë e festimeve përpara fillimit të Kupës së Botës në vitin 2014. Tani 21 vjeç, ylli i Manchester City do të jetë në majë të sulmit dhe tashmë ka pasur shijen e lavdisë, pasi fitoi medaljen e arit në Lojërat Olimpike me Brazilin në vitin 2016.

Kylian Mbappe (Francë)

Tani mban veshur fanellën me nr.10, e cila u bë e famshme për Francën nga Michel Platini dhe Zinedine Zidane. 19-vjeçari Kylian Mbappe do të kërkojë të lërë gjurmë në turneun e tij të parë. Paris Saint-Germain tashmë është i angazhuar për të paguar deri në 180 milionë euro për adoleshentin këtë verë, duke e bërë huazimin e tij të përhershëm. Ai është lojtari i dytë më i shtrenjtë i të gjitha kohërave.

Leroy Sane (Gjermani)

Leroy Sane e ka treguar veten si një nga lojtarët e rinj më premtues në Evropë, pas një fushate të mrekullueshme me Manchester City dhe tani është gati për Kupën e Botës, që do të jetë e para për të. 22-vjeçari provoi shijen e një kompeticioni madhor si një anëtar i skuadrës së Gjermanisë në “Euro 2016”, duke arritur në gjysmëfinale.

Thiago Alcantara (Spanjë)

Thiago Alcantara ka qenë pjesë e kombëtares së Spanjës, që nga viti 2011 kur debutoi kundër Italisë, por vetëm që nga viti 2016, maestro i mesfushës ka qenë një titullar i rregullt. Lojtari i Bayern Munich e ka Kupën e Botës në gjak, pasi babai i tij Mazinho, ka fituar turneun me Brazilin në vitin 1994.

Robert Lewandowski (Poloni)

Robert Lewandowski ka përfaqësuar Poloninë në dy turne, në Kampionatin Europian gjatë karrierës së tij, por në vitin 2018 ekipi kombëtar po përgatitet për Botërorin e parë, që nga viti 2006. Askush nuk ka shënuar më shumë gola në kualifikuese sesa sulmuesi i Bayern Munich, i cili shënoi 16 gola në 10 ndeshje, edhe më shumë se Cristiano Ronaldo, për Portugalinë.

N'Golo Kante (Francë)

N'Golo Kante sapo kishte ndihmuar Caen të ngjitej në elitën e futbollit në Francë në Ligue 1 në kohën kur po zhvillohej Kupa e Botës dhe debutimi i tij për Francën erdhi vetëm në vitin 2016, pasi ishte pjesë e Leicester. Mesfushori luajti në finalet e “Euro 2016” në të njëjtin vit, por u la si zëvendësues i papërdorur për ndeshjen e madhe kundër Portugalisë, të cilën “Les Bleus” e humbi.

Radamel Falcao (Kolumbi)

Më mirë vonë se kurrë, Radamel Falcao është vendosur të bëjë debutimin e tij në Kupën e Botës në moshën 32-vjeçare këtë verë, pas dëmtimit mizor katër vite më parë. Pas dy sezoneve të dështuara në Angli me Manchester United dhe Chelsea-n, tani kolumbiani është kthyer në formën e tij më të mirë për Monaco-n dhe shpreson të kompensojë kohën e humbur.

Philippe Coutinho (Brazil)

Ai debutoi në vitin 2010, por nuk ishte pjesë e skuadrës në Kupën e Botës të zhvilluar në vitin 2014 në Brazil. Philippe Coutinho është tani një anëtar kyç i “Seleçao”. Mesfushori që u ble për 160 milionë euro nga Barcelona është lojtari i tretë më i shtrenjtë në historinë e futbollit.Harry Kane (Angli)

Harry Kane (Angli)

Harry Kane kishte luajtur vetëm 26 ndeshje me ekipin e Tottenham në kohën e Kupës së Botës së fundit. Pas katër vjetësh sulmuesi i talentuar dhe ylli i Anglisë ka shënuar mbi 120 gola për klubin e tij. Ai bëri debutimin e tij me kombëtaren në vitin 2015 dhe tashmë ka shënuar 12 herë në 23 paraqitje për vendin e tij. Tifozët anglezë do të luten, që ai të jetë plotësisht i gatshëm për turneun.

Mohamed Salah (Egjipt)

Sulmuesi i Liverpool-it, Mohamed Salah nuk kishte lindur ende kur Egjipti kualifikohej për Kupën e Botës dhe ishte goli i tij, që vulosi kualifikimin e tyre për në Rusi. Salah është arsyeja pse Egjipti po cilësohet si një ekip, që mund të befasojë në këtë turne pas rikthimit të tij të pabesueshëm në Premier League. Për të arritur në fazën me eliminim direkt, duke përfunduar përpara Rusisë, Arabisë Saudite dhe Uruguajt sigurisht nuk duket e pamundur. /EDS/

Lajm jo i mirë për tifozët, Rusia me sanksione të forta për Botërorin 2018

Ti mund ta lexosh kete ne 1 min.
25 Prill 2018 23:06

Në një përpjekje për të parandaluar dhunën e tifozëve gjatë Botërorit, zyrtarët rusë kanë marrë vendimin për të ndaluar pijet alkoolike në Moskë gjatë zhvillimit të këtij kompeticioni. Në fakt alkooli do të lejohet të shitet nëpër stadiume apo zonat e tifozëve, por Bashkia e Moskës do të kufizojë shitjen e pijeve alkoolike jashtë këtyre zonave në kryeqytet, në ditën e ndeshjeve dhe një ditë përpara.


Kohët e fundit tifozët rusë kanë krijuar rrëmuja kudo ku kanë udhëtuar, kur gjatë zhvillimit të Euro 2016 në Francë u konfliktuan me përkrahësit anglezë, që u pasua nga në një numër i madh arrestimesh. Në formë hakmarrjeje huliganët nga vendi pritës kanë kërcënuar me vdekje tifozët anglezët, nëse vendosin të udhëtojnë në Rusi.


Zyrtari i Bashkisë së Moskës, Kirill Malyshkin deklaroi: "Organet ekzekutive kanë përcaktuar tashmë vendet ku do të ndalohet shitja dhe konsumimi i alkoolit, në prag të një ndeshje futbolli të Kupës së Botës. Pubet, restorantet, supermarkete dhe të gjitha pikat e tjera të shitjeve, do të preken nga ky vendim dhe janë të detyruara të zbatojnë këtë vendim, sepse në të kundërtën do të kenë pasoja të rënda”.

Në dy stadiumet e Moskës do të zhvillohen gjithsej 12 ndeshje gjatë gjithë turneun, duke përfshirë finalen dhe gjysmëfinalen. Por për habinë e të gjithëve, tifozët do lejohen të hyjnë në stadium me kanabis, kokainë dhe madje heroine, por jo me alkool. /EDS/

Telashe për trajnerin e Anglisë, talenti i skuadrës humbet Botërorin

Ti mund ta lexosh kete ne 1 min.
25 Prill 2018 21:31

Mesfushori i Liverpool, Alex Oxlade-Chamberlain, ka pësuar një dëmtim të ligamenteve, që do ta lërë jashtë nga Kampionati Botëror. Anglezi u largua nga fusha me barelë gjatë pjesës së parë të ndeshjes gjysmëfinale të Champions League, kundër Romës në mbrëmjen e së martës, e fituar nga anglezët me rezultatin 5-2.


Ai u nënshtrua një sërë analizash të mërkurën, që zbuluan dëmtimin e ligamenteve, edhe pse klubi nuk ka dhënë asnjë informacion për kohën e saktë që lojtari do jetë jashtë fushave.
Menjëherë pas përgjigjeve të analizave 24-vjeçari, ka telefonuar trajnerin e kombëtares angleze Gareth Southgate, për t’i shpjeguar lëndimin dhe pasojat.
“Liverpool konfirmon se sezoni për Alex Oxlade-Chamberlain ka përfunduar. Dëmtimi në ligamentet e gjurit në ndeshjen ndaj Romës, të martën mbrëma ka mbyllur sezonin si për klubin dhe kombëtaren”, thuhet në deklaratën e klubit.


“Për analizat e 24-vjeçarit u kujdes ekipi mjekësor i klubit në Melwood, të mërkurën në mëngjes, por pa përcaktuar afat për kthimin e tij në fushë. Megjithatë, pritet që Oxlade-Chamberlain të fillojë një program rehabilitimi në mënyrë që të rifitojë formën, sa më shpejt që të jetë e mundur, duke u rikthyer në sezonin e ardhshëm”. Dëmtimi zbehu atmosferën e asaj fitoreje emocionuese në Anfield ku trajneri Jurgen Klopp deklaroi pas ndeshjes: “Ajo që na prishi humorin është dëmtimi i Chamberlain, sepse kemi humbur një lojtar fantastik”.
Ky është turneu i dytë ndërkombëtar që 24-vjeçari do të mungojë, pasi ai nuk u grumbullua nga Roy Hodgson-it në Euro 2016, kur aktivizohej me Arsenalin. /EDS/

Probleme me Messin dhe Sampaolin? Icardi sqaron të vërtetën

Ti mund ta lexosh kete ne 2 min.
25 Prill 2018 17:13
Ftesa e munguar për në Botëror

“Jam në pritje dhe shpresoj, madje, nuk e pres listën e lojtarëve që do thirren me presion mbi kokë apo nervozizëm, jam një njeri që preferoj të pres”. Në këtë mënyrë e përjeton Mauro Icardi pritjen për t’u thirrur në kombëtare për Botërorin e Rusisë me fanellën e Argjentinës. Kanë kaluar 6 muaj që nga hera e fundit që ai është thirrur nga trajneri Jorge Sampaoli, i cili më pas preferoi të thërrasë të tjerë lojtarë, duke e lënë “bomberin” e Serie A në hije.

“Jam i bindur se në Botëror do të shkojnë ata që janë lojtarët më të mirë”, tha për gazetën sportive argjentinase “Ole” 25-vjeçari që luan me Inter-in dhe që është i kërkuar nga shumë skuadra në Europë. “Jam 25 vjeç, jam kapiteni i Inter-it prej tre vitesh, me golat e mi kam hyrë në historinë e klubit zikaltër. Normalisht që jam gati që të luaj në Kupën e Botës, nëse jo tani, jam për edicionin e ardhshëm. Jam i lumtur që kam dhënë kontributin tim në kualifikuese”, vijoi “bomberi” zikaltër, i cili shton se brenda pak ditësh do të bëjë një takim me Sampaoli-n.

“Mendoj se në kombëtare ka gjithnjë një mundësi të dytë”, shton me plotë besim sulmuesi që mendon se duhet të shohë veten krah Higuain-it dhe Aguero-s. “Ata janë më të vjetrit, i njoh dhe i respektoj. E meritojnë që të jenë në kombëtare, nëse janë zgjedhur ata, duhet të kemi besim dhe t’i mbështesim. Sampaoli e di që është një rol që ka shumë përgjegjësi dhe në fushë roli jonë është vendimtar”, shtoi Icardi, i cili i dërgon urime Kun Aguero-s që është operuar në gju dhe do të rrijë jashtë për pesë javë.

“Shpresoj që ta marrë shumë shpejtë veten nga dëmtimi”. Sa i përket Higuain-it “është një sulmues me nivel botëror dhe e meriton kombëtaren”. E thotë këtë, “brenda apo jashtë listës së kombëtares, ndihem përherë pjesë e grupit”, shtoi Maurito që e di se “ka mbështetjen e argjentinasve”, dhe mohon veton e supozuar nga Messi. “Kam një raport të shkëlqyer me të gjithë dhe asnjëherë nuk kam qenë i ndikuar nga fjalët. Këtë herë po fliten fjalë të pavërteta. Me Leo-n kam raport normal dhe e di që unë dhe ai kemi të njëjtën ëndërr. Mendoj se nëse i bëjmë gjërat mirë, do të kemi mundësi që të argëtohemi në Rusi dhe nuk mund t’i trembemi asnjë skuadre. Pa harruar që kemi lojtarin më të mirë të botës”. /EDS/

Botërori Rusi 2018, FIFA arrin akordin me një tjetër sponsor të turneut

Ti mund ta lexosh kete ne 1 min.
24 Prill 2018 20:40

Miniera e diamantit e zotëruar nga shteti Rus, Alrosa, është përcaktuar si sponsori i katërt dhe i fundit rajonal i Kupës së Botës që do zhvillohet këtë vit në Rusi. Në këtë mënyrë Alrosa i bashkohet gjigantëve të Alfa-Bank, Rostelecom dhe Hekurudhës Ruse, si sponsorë rajonalë të turneut të futbollit, i cili do të luhet në datat 14 qershori deri më 15 korrik.

Alrosa ka fituar të drejtën për të përdorur markën e tyre gjatë këtij turneu, ku mund të promovohen edhe në rrjetet sociale të Botërorit. Kompania do të përfitojë nga reklamimi në ekranet LED të stadiumit ku do të zhvillohet Kupa e Botës, si dhe ekspozimi i markës në zona të zgjedhura të stadiume.
“Me Kupën e Botës që po afron, ne jemi shumë të lumtur t’ju njoftojmë që kemi nënshkruar një marrëveshje sponsorizimi me një kompani prestigjoze si Alrosa”, - deklaroi shefi i marketingut pranë FIFA-s, Philippe Le Floc'h. “Turneu do të jetë një festë e futbollit në Rusi dhe në të gjithë globin. Është gjithashtu një platformë e pabesueshme marketingu ndërkombëtar, duke tërhequr miliarda njerëz në çdo vend të botës, ku futbolli ndiqet”.


16 vendet e caktuara për sponsorë të tjerë rajonal - për Amerikën Veriore dhe Qendrore, Amerikën e Jugut, Afrikën dhe Lindjen e Mesme dhe Azinë - janë akoma bosh, dhe duhen plotësuar para datës 14 qershor. Kompania ruse e energjisë shtetërore Gazprom është midis shtatë sponsorëve të nivelit të lartë.
FIFA këtë edicion ka nënshkruar vetëm me sponsorë nga Rusia, Kina dhe Katari, për shkak të reputacionit në zbritje, nga hetimet zyrtare për korrupsion në vitin 2015, që u zhvilluan nga Zvicra dhe Amerika. /EDS/